«Zakryvać treba k čortu ŭsie resursy». Redaktarka «Minskaj chvali» vučyła rasijan zmahacca z apazicyjnymi ŚMI
Maryna Subota prapanavała rasijskim kaleham radykalnaje rašeńnie.
Hałoŭnaja redaktarka radyjo «Minskaja chvala», jakoje ŭvachodzić u strukturu «Minskaj praŭdy», paŭdzielničała ŭ miedyjaforumie krain SND «Raźvićcio miedyjaŭ u źmienlivym śviecie». Ale razumieńnie słova «raźvićcio» ŭ Maryny Suboty davoli śpiecyfičnaje.
Prapahandystka vystupiła z dakładam pra baraćbu z fejkami. Tak u Biełarusi, dy i ŭ Rasii, nazyvajuć lubuju infarmacyju, jakaja nie adpaviadaje aficyjnamu dziaržaŭnamu paradku. Subota prapanavała radykalnaje rašeńnie prablemy apazicyjnych ŚMI.
«Efiektyŭniej za ŭsio dla abarony ad fejkaŭ — hruba kažučy, zavalić ułasnaje miedyjapole infarmacyjaj. Kali heta palityka, to 10 mierkavańniaŭ sumniŭnych ekśpiertaŭ pierakryvajem 100 mierkavańniami niesumniŭnych ekśpiertaŭ. 50 na 50 — drenny raskład dla baraćby ŭ infapoli. Heta łatareja: što pieršaje pračytaje karystalnik?
Voś kali varožych paviedamleńniaŭ 10, a našych 100 — zusim inšy raskład. 10 fejkaŭ prosta patanuć u patoku infarmacyi», — adznačyła Subota.
Jość u jaje i druhaja prapanova — na toj vypadak, kali pieršaja na spracuje.
«Jak jašče źmienšyć kolkaść chłuśni? Nie zrazumiejcie mianie niapravilna, skažu, mahčyma, kramolnuju dla rasijan reč. Ale, jak pakazvaje naša praktyka, zakryvać treba k čortu ŭsie resursy, jakija zajmajucca vytvorčaściu fejkaŭ. Zakryvać!
Techničnyja abmiežavańni dostupu da sajtaŭ, abviaščeńnie Telegram-kanałaŭ ekstremisckimi z administracyjnaj i kryminalnaj adkaznaściu dla hramadzian za supracoŭnictva z takimi resursami, hramadskaje asudžeńnie za spažyvańnie takoha kantentu». I heta jość stratehija, a nie taktyka. Zachavańnie dziaržaŭnaści», — ličyć Subota.
Ciapier čytajuć
Biełarus Dźmitryj Šepieleŭ raskazaŭ padrabiaznaści chvaroby, lačeńnia i śmierci Žanny Fryskie7
Kamientary