Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ
Raniej paviedamlałasia, što jon — ź siamji kadebistaŭ. Z dapamohaj prajekta Digital intelligence team my pravieryli fakty ź bijahrafii Paviełki.
Viktaru Paviełku 36 hadoŭ. Rodam jon ź Minska. Advučyŭsia ŭ škole, paśla pastupiŭ va ŭniviersitet u Varšavie.
Pa źviestkach Digital intelligence team, baćki Paviełki nie datyčnyja da siłavych struktur. Baćka kiruje sałonam pryhažości ŭ Minsku, tam ža pracuje i maci. Datyčnyja jany i da inšaj firmy, jakaja pradavała kaśmietyku — tam pracavaŭ niejki čas i sam Viktar. Baćka taksama mieŭ IP, jakoje zdavała nieruchomaść u arendu.
Brat Viktara taksama zajmajecca biznesam, pradaje bankaŭskaje abstalavańnie i ličylniki banknotaŭ. Apošnim časam biznes, padobna, pieražyvaje nie najlepšyja časy — pa źviestkach DIT, u jaho było niekalki sudoŭ z tymi, kamu jon byŭ vinien hrošaŭ.
Čym Viktar Paviełka zajmaŭsia ŭ Polščy, dakładna nieviadoma, ale zapisaŭ pra jaho pracu ŭ Biełarusi paśla 2014 hoda ŭ bazach niama. Jość uskosnyja suviazi z Rasijaj — jon byŭ klijentam niekalkich bankaŭ tam, na 2023 hod jahonyja rachunki pracavali.
Nahadajem, imia Viktara Paviełki vyśvietliła rasijskaja «Miediazona». Vydańnie raskazała, što jaho asudzili ŭ Polščy pa spravie ab machlarstvie i admyvańni hrošaj. Adnoj z 17 abvinavačanych tady stała viadomaja ŭ Polščy televiadučaja Marcelina Zavadskaja, jakuju źviazvali z Paviełkam ramantyčnyja stasunki.
Jak raskazvała polskaje vydańnie Polityka, Paviełka — syn aficera KDB Biełarusi, a ŭ Polščy jon stvaryŭ złačynnuju hrupu, jakaja prymušała ludziej da machlarstva. Siarod ich była i televiadučaja Zavadskaja.
Praŭda, infarmacyja pra toje, što jon syn aficera KDB nie paćvierdziłasia, anijakich suviaziaŭ ź siłavymi strukturami ŭ jaho svajakoŭ niama. Mahčyma, jon sam vydumaŭ niešta pra siabie, kab prydać sabie vahi, ci hetuju infarmacyju dadumali krynicy polskich žurnalistaŭ.
Jamu dali 3 hady i 8 miesiacaŭ kałonii, ale na toj momant Paviełka ŭžo pravioŭ u SIZA dva hady, tamu nieŭzabavie musiŭ vyjści na volu.
Proźvišča Paviełka adnojčy zhadvaje ŭ pierapiscy juryst Anatol Blinoŭ, aryštavany za arhanizacyju napadu na Leanida Vołkava i inšych rasijskich apazicyjanieraŭ.
«Jość navina — jość kurjer, jaki vozić załatyja maniety i hrošy ź Biełarusi ŭ Šviejcaryju i nazad. Znajomy majho numizmata, — pisaŭ jon 1 śniežnia 2023 hoda. — Bankaŭski kurjer — Paviełka Uładzimir».
Pra kaho mienavita tut idzie havorka, ź pierapiski niezrazumieła (nie vyklučana, što Blinoŭ prosta pierabłytaŭ imia). Siarod blizkich svajakoŭ Paviełki nijakich Uładzimiraŭ niama.
U prakuratury Polščy «Miediazonie» paviedamili, što pa spravie ab napadach na rasijskich apazicyjanieraŭ biełarusu vystaŭlenyja try abvinavačvańni, siarod ich — arhanizacyja napadu pa palityčnych matyvach. Jon u SIZA. Kali vieryć listu Blinova, Paviełka supracoŭničaje sa śledstvam i daje suprać jaho pakazańni.
«Naša Niva» — bastyjon biełaruščyny
PADTRYMAĆ
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary
A tady možna damovicca sa śpiecsłužbami Litvy, Łatvii i Polščy, kab zrabić dublikaty biełaruskich rubloŭ, drukavać poŭnaściu aryhinalnyja rubli.
Zaklikać ludziej nie pracavać i nie płacić padatki, a ŭ jakaści dapamohi vypłačvać hetyja rubli. Naprykład, pa 1500 rubloŭ u miesiac kožnamu, chto nie płacić padatki.
Kab atrymać dapamohu, treba vyjechać u adnu z krain JEZ (naprykład, u Litvu, Łatviju abo Polšču).
Elektarat Łukašenki składaje 30%, jakija tearetyčna buduć pracavać, astatnija 70% abo pa-za palitykaj, abo suprać Łukašenki. Voś, naprykład, apalityčny hramadzianin: pierad im vybar — pracavać i atrymlivać 1500 rubloŭ, albo nie pracavać. Vidavočna, što 99% vybieruć nie pracavać. Takim čynam, Biełaruś čakaje sacyjalna-ekanamičny kałaps. I možna takim čynam vyjści na pieramovy z režymam ab demakratyzacyi.