Pušystyja VIP-klijenty. Jak u Baraŭlanach stvaryli cyrulniu dla chatnich žyvioł

Pavodle adukacyi Iryna — stamatołah, i jana pracuje pa śpiecyjalnaści. Adnak žančyna nie ŭjaŭlaje žyćcia biez žyvioł, tamu jana mieła nadzieju adkryć dla ich niejkaje śpiecyjalizavanaje miesca.

— Ja zaŭsiody maryła pra pracu, kudy možna było b brać svaich hadavancaŭ z saboj. U nas ža ŭ balnicach usio maksimalna sterylna, navat piarścionki nielha nasić, pra jakich užo sabak i moža iści havorka, — z uśmieškaj raskazvaje surazmoŭca.

Nazva «Viasioły aśluk» taksama źjaviłasia nie vypadkova, jana adsyłajecca da Biblii. Jak usie pamiatajuć, Isus ujechaŭ u Ijerusalim jakraz na aśle, i heta žyvioła ŭ cełym asacyjujecca z dabrynioj i ŭpartaściu.

Pavialičyć

Jak časta treba rabić stryžku i abrazać kipciury?

Samyja častyja naviedvalniki hetaha miesca — jorki, malteze, špic i korhi. Nie radziej pryvodziać kotak, adnak Iryna kateharyčna suprać ich stryžki: «Stryžem tolki tych, u kaho kaŭtuny, jakija ŭžo niemahčyma vyčyścić. A prosta tak pastryhčy kata — heta žorstkaść. U ich parušajecca termarehulacyja, i žyvioła mierźnie».

Z sabakami trochi inšaja historyja. Naprykład, jorki abo tyja ž malteze abrastajuć i nie liniajuć, tamu ŭ haračuju paru hoda treba abrazać poŭść, kab žyviole było kamfortna. Taksama dla drobnych parod važna vyčyščać kaŭtuny, jakija ŭtvarajucca sami pa sabie i ad adzieńnia, jakoje sabaka nosić u chałodny čas hoda.

Pavialičyć

— Pryvodzić sabak na stryžku treba kožnyja 2-3 miesiacy, pry hetym nieabchodna vyčyščać poŭść doma. Kaŭtuny nie tolki prynosiać dyskamfort, ale i mohuć stać pryčynaj skurnych zachvorvańniaŭ, — kaža Iryna.

Dla Iryny čyścinia i dohlad sabaki — heta nie prosta estetyka, a pakazčyk kłopatu, svajho rodu vizitoŭka.

Važna, kab u žyvioły byli čystyja vušy, padstryžanyja kipciury, vydalenyja zubnyja adkłady. Darečy, rehularnaja stryžka kipciuroŭ (kožnyja try tydni) — heta nieabchodnaść, jakaja praduchilaje prablemy z pastavaj i chadoj sabaki. Doŭhija kipciury prymušajuć žyviołu chadzić nie na padušačkach, jak treba, a mienavita na kipciach, što pryvodzić da pierakosu chrybietnika i bolevych adčuvańniaŭ.

Pavialičyć

— Dla mianie značna važniej, kab žyvioła była dobra vyčyščana, vymyta i adčuvała siabie kamfortna, čym ślepa prytrymlivacca mody i rabić vystavačnuju stryžku.

Darečy, da Novaha hoda zaŭsiody nazirajecca prytok naviedvalnikaŭ. Jak vyśvietliłasia, nie tolki ludzi prybirajucca i ŭpryhožvajucca napiaredadni śviata, ale i ich čatyrochnohija siabry!

• 1
• 0
• 0
• 0
• 0
• 0
• 0
• 0