Novaabrany prezident ZŠA Donald Tramp žartam prapanavaŭ premjeru Džaścinu Trudo zrabić z Kanady 51-y amierykanski štat, kali taja nie moža nie rašyć svaich prablem sama. Pra jakija prablemy idzie havorka i jakoj była reakcyja Trudo?
Kanadski premjer Džaścin Trudo ŭ minułuju piatnicu biez abviaščeńnia prylacieŭ u ZŠA dla sustrečy z Donaldam Trampam paśla taho, jak apošni abviaściŭ pra svaje namiery pavialičyć pošliny na pradukcyju z Kanady i Mieksiki, paviedamlaje amierykanski telekanał Fox News.
Pavodle dźviuch krynic telekanała, jakija asabista prysutničali na pieramovach Trampa i Trudo, novaabrany prezident ZŠA vykazaŭ pretenzii da kanadskaha boku ŭ suviazi ź niedastatkovym kantrolem nad patokami nielehalnych imihrantaŭ i narkotykaŭ, što prachodziać praz paŭnočnuju miažu ŭ ZŠA.
Akramia taho, Tramp acaniŭ handlovy deficyt pamiž dvuma krainami ŭ bolš čym $100 miljardaŭ i pryhraziŭ, što «biez pazityŭnych źmienaŭ u vyšejpieraličanych prablemach uviadzie 25% taryfy na ŭsie kanadskija tavary ź pieršaha dnia svajho znachodžańnia na pasadzie».
Trudo adkazaŭ, što ŭviadzieńnie takich taryfaŭ budzie katastrafičnym dla kanadskaj ekanomiki. Na heta Tramp adreahavaŭ pytańniem: «Vaša kraina nie moža vyžyć biez taho, kab abdzirać ZŠA na $100 miljardaŭ? Moža, Kanadzie varta dałučycca da ZŠA i stać našym 51-ym štatam?», — cytujuć krynicy Fox News novaha amierykanskaha prezidenta.
Pa ich słovach, takaja prapanova vyklikała ŭ Trudo i niekalkich inšych prysutnych «niervovy śmiech», adnak, jak adznačajuć krynicy, «Tramp byŭ u toj momant dosyć pramaliniejny, niahledziačy na svaju haścinnaść i dobrazyčlivaść padčas pieramovaŭ».
Bolš za toje, Tramp nie spyniŭsia ŭ svajoj rytorycy nakont mahčymaha dałučeńnia Kanady i navat prapanavaŭ Trudo ŭznačalić jaje ŭ jakaści adnaho z amierykanskich hubiernataraŭ, adznačaje Fox News. Supravadziŭsia hety niajomki momant jašče i tym, što Tramp dapuściŭ padzialeńnie Kanady pry jaje dałučeńni da ZŠA.
«Źviartajučysia da Trudo, Tramp zajaviŭ, što jahony tytuł «premjer-ministr» choć i hučyć lepš, ale jon usio roŭna moh by stać hubiernataram 51-ha štata. U hety momant adzin z prysutnych zaŭvažyŭ, što Kanada mahła b stać samym libieralnym z amierykanskich štataŭ. Tramp uśled prapanavaŭ zrabić z Kanady adrazu dva štaty — libieralny i kansiervatyŭny. Heta vyklikała jašče bolš śmiechu», — raspaviadajuć krynicy Fox News.
Na hety momant ni kamanda Trampa, ni pradstaŭniki Trudo nie davali kamientaroŭ nakont vyšejapisanaj razmovy. Tym nie mienš zajavy Trampa vyklikali šyrokuju dyskusiju pra budučyniu amierykanska-kanadskich adnosin i pahrozu surjoznaha cisku ZŠA na svajho paŭnočnaha susieda, adznačaje Fox News.
Tramp abmoviŭsia, što hatovy pajści na treci termin. A ci mahčyma takoje ŭ ZŠA ŭvohule?
Kiepski mir ci zaciažnaja vajna. Jak Ukraina rychtujecca da taho, što Tramp pasprabuje adrazu pasadzić jaje za stoł pieramovaŭ
Mask i Ramasvami raskazali, jak buduć skaračać vydatki. Voś čamu heta moža mocna paŭpłyvać i na Biełaruś
Kamientary