U Brusieli z 9 pa 13 śniežnia prachodziać Dni Biełarusi, arhanizavanyja Jeŭrapiejskaj słužbaj źniešnich dziejańniaŭ (JESZD) i Jeŭrakamisijaj u supracy z Jeŭraparłamientam.
Dni Biełarusi — heta sieryja padziej, arhanizavanych Jeŭrapiejskaj słužbaj źniešnich dziejańniaŭ i Jeŭrapiejskaj kamisijaj u supracoŭnictvie ź Jeŭrapiejskim parłamientam 9-13 śniežnia 2024 hoda i pryśviečanych demakratyčnaj Biełarusi i narodu Biełarusi. Z hetaj nahody ES zaprasiŭ bolš za 100 pradstaŭnikoŭ demakratyčnych sił Biełarusi, hramadzianskaj supolnaści, niezaležnych ŚMI, pravaabarončych i kulturnickich arhanizacyj, a taksama biełaruskaj dyjaspary i mižnarodnych arhanizacyj, piša Budźma.
Hetaja sieryja padziej — znak salidarnaści Jeŭrapiejskaha sajuza z narodam Biełarusi. Jany prymierkavanyja da pačatku pracy novaha składu Jeŭrapiejskaha parłamienta i adbyvajucca napiaredadni tak zvanych prezidenckich vybaraŭ u Biełarusi 26 studzienia 2025 hoda. Imprezy dazvolać pradstavić prykłady stanoŭčaha ŭpłyvu padtrymki ES.
12 śniežnia a 17:00 u budynku Misii demakratyčnaj Biełarusi ŭ Brusieli (MDB; Rue de la Science 23) budzie arhanizavany prahlad filma «7 simptomaŭ biełaruskaści».
U MDB taksama prachodzić vystava tradycyjnaj biełaruskaj vyšyŭki #FRAMEDINBELARUS.
Vystava «Hałasy z turmy. Mastactva jak supraciŭ: malunki i listy palitviaźniaŭ Biełarusi» budzie ekspanavacca ŭ budynku JESZD z 11 śniežnia (adkryćcio a 16:00, tolki dla zaprošanych asob).
Vystava «Niezłamanyja», pryśviečanaja palitviaźniam — biełaruskim pravaabaroncam, adkryjecca na piešachodnaj zonie Jeŭraparłamienta 12 śniežnia a 9:00 (budzie pracavać da 20 śniežnia).
11 śniežnia projdzie muzyčnaja viečaryna (Flagey, Studio 1, Place Sainte-Croix) pry ŭdziele «Volnaha choru» i biełaruskaha akardeanista Jahora Zabiełava. Paśla jaho adbudziecca adkryćcio fotavystavy biełaruskaha mastaka Alaksandra Kot-Zajcava, pryśviečanaj «pačućciu doma» ŭ biełarusaŭ, vymušanych žyć u emihracyi.
Ekśpiertnaja dyskusija pra «procidziejańnie dezinfarmacyi napiaredadni tak zvanych prezidenckich vybaraŭ» projdzie 13 śniežnia a 10:00 (miesca ŭdakładniajecca). Jaje arhanizujuć Jeŭrapiejski fond u padtrymku demakratyi i Jeŭrapiejski ekanamičny i sacyjalny kamitet.
Jeŭrapiejski forum pa Biełarusi — sieminar, pryśviečany situacyi ŭ krainie i klučavym vyklikam u śfiery biaśpieki dla jaje i ŭsiaho rehijonu, adkryjecca 13 śniežnia ŭ 9:30 u MDB abo ŭ pradstaŭnictvie Šviecyi pry ES (udakładniajecca).
U ramkach Dzion Biełarusi 11 śniežnia adbudziecca čaćviortaja sustreča kansultatyŭnaj hrupy ES z demakratyčnymi siłami i hramadzianskaj supolnaściu Biełarusi.
Na 12 śniežnia ŭ Jeŭraparłamiencie zapłanavanaje praviadzieńnie kanfierencyi vysokaha ŭzroŭniu «Razam z narodam Biełarusi», na adkryćci jakoj vystupiać Cichanoŭskaja i prezident JEP Rabierta Mietsoła.
Z padrabiaznaj prahramaj možna aznajomicca pa spasyłcy.
Skončyła žyćcio samahubstvam Śviatłana Krucikava ź Pinska, jakuju nieadnarazova sudzili za «ekstremizm»1
Kamientary