Premjer Słavakii pahražaje spynić pastaŭki elektraenierhii Ukrainie
Robiert Fica mienš čym praz tydzień paśla vizitu ŭ Maskvu vystaviŭ Ukrainie ŭltymatum. Jon zajaviŭ, što ŭ adkaz na abvieščanaje Kijevam spynieńnie z 1 studzienia tranzitu rasijskaha hazu Słavakija moža prypynić pastaŭki elektraenierhii, piša Bi-bi-si.
U svaim dziesiacichvilinnym zvarocie Fica papiaredziŭ pra mahčymyja miery ŭ adkaz, kali Ukraina nie admovicca ad płanaŭ spynić tranzit rasijskaha hazu. «Paśla 1 studzienia my acenim situacyju i mahčymyja miery suprać Ukrainy. Kali heta budzie nieabchodna, my spynim pastaŭki elektraenierhii, jakaja patrebna Ukrainie padčas adklučeńniaŭ sietki. Albo my damovimsia ab inšych šlachach», — zajaviŭ jon.
Słavakija źjaŭlajecca adnym z klučavych partnioraŭ Ukrainy ŭ enierhietyčnaj śfiery. U vyniku rasijskich rakietnych udaraŭ było źniščana bolš za 80% enierhietyčnych abjektaŭ Ukrainy.
Pavodle słoŭ kiraŭnika kampanii «Ukrenierha» Uładzimira Kudryckaha, paźbiehnuć błekautu zimoj 2024—2025 hoda možna budzie, u tym liku, dziakujučy impartu elektraenierhii ź Jeŭropy. U kastryčniku Słavakija abiacała zabiaśpiečyć Ukrainu avaryjnymi pastaŭkami enierhii.
Premjer-ministr nazvaŭ rašeńnie Ukrainy ab spynieńni tranzitu «nadzvyčaj darahim žestam».
«Jeŭrapiejski sajuz zapłacić kala 120 miljardaŭ jeŭra bolš za pavyšeńnie cen na haz i elektraenierhiju ŭ 2025 i 2026 hadach. Naša kankurentazdolnaść znoŭ źnizicca. Słavakija stracić pryblizna paŭmiljarda jeŭra na tranzitnych zborach, Ukraina stracić amal miljard jeŭra, a Rasija, imavierna, stracić tolki 2,5 miljarda jeŭra. My pakarali rasijan, ci nie tak?» — skazaŭ Fica.
Jon taksama dadaŭ, što ŭ vyniku pavysiacca ceny na haz u Słavakii, a kraina akažacca ŭ kancy łancužka pastavak, kali jany buduć ažyćciaŭlacca pa alternatyŭnych maršrutach. U hetaj situacyi, pavodle Ficy, vyjhrajuć tolki ZŠA.
22 śniežnia Robiert Fica prybyŭ na pieramovy ŭ Maskvu. Paśla sustrečy z Uładzimiram Pucinym słavacki premjer zajaviŭ, što jaho vizit — adkaz na dziejańni Zialenskaha. Za try dni da hetaha Fica paviedamiŭ, što ŭkrainski prezident u razmovie ź im paćvierdziŭ namiery spynić tranzit rasijskaha hazu praz Słavakiju.
Ukraina papiaredžvała, što spynić tranzit rasijskaha hazu ŭ Jeŭropu z 1 studzienia 2025 hoda. Pahadnieńnie pamiž NAK «Naftahaz Ukrainy» i «Hazpramam», padpisanaje ŭ śniežni 2019 hoda, zakančvajecca 31 śniežnia 2024 hoda.
Z 2022 hoda, niahledziačy na vajnu z Rasijaj, Ukraina praciahvała vykonvać umovy pahadnieńnia i zabiaśpiečvać tranzit rasijskaha hazu ŭ Jeŭropu.
U svaim apošnim zvarocie, raźmieščanym u błohu premjera, Fica taksama asudziŭ Zialenskaha za admovu ad spynieńnia ahniu. «Pieramoŭnaja pazicyja Ukrainy paharšajecca z kožnym dniom, i Ukraina zapłacić vielizarnuju canu za hetuju avanturu Zachadu ŭ vyhladzie straty terytoryj i prysutnaści zamiežnych vojskaŭ», — zajaviŭ jon.
Fica prapanavaŭ Słavakiju ŭ jakaści placoŭki dla mirnych pieramoŭ i adznačyŭ, što abmiarkoŭvaŭ hetuju temu z Uładzimiram Pucinym. U najbližejšy čas premjer-ministr płanuje naviedać Vatykan i Turcyju, dzie taksama budzie ŭzdymać pytańnie spynieńnia vajennaha kanfliktu pamiž Rasijaj i Ukrainaj.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary
Havaryć i rabić - roznyja rečy, elektryka, jakaja idzie tranzitam - nie słavackaja, pierakryć jon jaje nia moža - adrazu papadzie na hrošy. I vializnyja hrošy.
Pračnuŭsia, kaźlina, dobraj ranicy - kali astatnija krainy šukali alternatyvy - jen razam z Arbanam hulali na hierojaŭ i zajmalisia asabistymi spravami - reformaj uhałoŭnaha zakonu, zvalnieńniami ŭ Ministerstvie unutranych spraŭ i h.d.