U Rasii abvinavacili Małdovu ŭ dyskryminacyi rasijan i ŭ skačvańni da nieanacyzmu. U Małdovie adkazali

Što zajavili ŭ MZS Rasii?

Ministerstva zamiežnych spraŭ Rasii 20 śniežnia apublikavała dakład namieśnika kiraŭnika MZS Siarhieja Viaršynina.

U im sabrali infarmacyju ab «parušeńniach pravoŭ rasijskich hramadzian i suajčyńnikaŭ» u 42 krainach i ŭ Kosavie. Pa viersii rasijskaha źniešniepalityčnaha viedamstva, «prablema parušeńnia pravoŭ vychadcaŭ z Rasii za miažoj na praciahu apošnich hadoŭ tolki paharšajecca namahańniami zachodnich krain».

U dakładzie havorycca, što Małdova «imkliva skočvajecca da padtrymki ideałohij nieanacyzmu i rasavaj dyskryminacyi», a biezalternatyŭny prajeŭrapiejski kurs małdaŭskaha kiraŭnictva «maje na ŭvazie poŭny razryŭ histaryčnych i kulturnych suviaziaŭ z Rasijaj».

«Karystajučysia padziejami va Ukrainie, «kalektyŭny Zachad» praciahvaje nastojlivyja sproby ŭciahnuć Małdovu ŭ kaalicyju zaŭziatych rusafobaŭ. Naraŭnie z asudžeńniem rasijskaj SVA [vajny va Ukrainie] i zaklikam da spynieńnia bajavych dziejańniaŭ, małdaŭskija ŭłady na słovach vykazvajuć prychilnaść jeŭraintehracyi i kanstytucyjnamu niejtralitetu, adnak u realnaści adbyvajecca ŭstalavańnie tatalitarnaha režymu», — śćviardžaje MZS Rasii.

Rasijskaje viedamstva ličyć, što toje, što adbyvajecca siońnia ŭ Małdovie, praktyčna całkam supadaje z tymi pracesami, jakija naziralisia va Ukrainie.

«Režym M. Sandu, padobna Uł. Zialenskamu, a da jaho P. Parašenka, «na šlachu da jeŭraintehracyi» imkniecca tatalitarnymi mietadami «admianić» ceły etap historyi ŭłasnaj krainy, źniščyŭšy savieckuju spadčynu, u tym liku i lubyja prajavy kultury nacyjanalnych mienšaściaŭ. U hetych metach urad hetaj krainy prykładaje namahańni, kab razarvać histaryčnyja suviazi pamiž Rasijaj i Małdovaj, kultury jakich uzajemna blizkija, i vykaranić usio ruskaje na svajoj terytoryi. Bolš za toje, dziela ŭstupleńnia ŭ ES (ci ŭ skład Rumynii, jak ličać mnohija ekśpierty) małdaŭskija ŭłady navat demanstrujuć hatoŭnaść źniščać nacyjanalnuju małdaŭskuju identyčnaść krainy, vydajučy jaje za rumynskuju», — havorycca ŭ dakładzie.

Ministerstva taksama paskardziłasia na «nastupleńnie na histaryčnuju pamiać ab Vialikaj Ajčynnaj vajnie», «niaroŭnaje stanovišča roznych etnasaŭ», «nasadžeńnie ksienafobii i nieciarpimaści», «abmiežavańnie ruskamoŭnaha viaščańnia», «manipulavańnie śviadomaściu padrastajučaha pakaleńnia» i mnohaje inšaje.

«Paśla pačatku Rasijaj śpiecyjalnaj vajennaj apieracyi [vajny va Ukrainie] pa denacyfikacyi i demilitaryzacyi Ukrainy i abaronie mirnaha nasielnictva Danbasa ŭ Małdovie adbylisia źmieny ŭ horšy bok dla rasijskich hramadzian i ruskamoŭnych žycharoŭ», — ličyć viedamstva.

MZS Małdovy adchiliŭ abvinavačańni

Ministerstva zamiežnych spraŭ Małdovy 28 śniežnia abvierhła abvinavačańni.

«Ministerstva kateharyčna abviarhaje nieabhruntavanyja abvinavačvańni, vykładzienyja ŭ štohadovym dakładzie MZS Rasii, pra nibyta dyskryminacyju rasijskich hramadzian i prasoŭvańnie rusafobii na terytoryi Małdovy. Hetyja śćviardžeńni biespadstaŭnyja i nakiravanyja na raskoł hramadstva.

U adroźnieńnie ad Rasii, Małdova całkam pavažaje asnoŭnyja pravy i svabody ŭsich hramadzian, niezaležna ad ich nacyjanalnaści, etničnaj prynaležnaści ci movy. Małdaŭskija ŭłady stroha prytrymlivajucca pryncypaŭ pravavoj dziaržavy i mižnarodnych normaŭ u halinie abarony pravoŭ čałavieka», — zajavili ŭ MZS Małdovy.

Ministerstva taksama asudziła pravakacyjnuju zajavu ab «padabienstvie z ukrainskim scenaram».

«[Takija zajavy] nie spryjajuć umacavańniu biaśpieki ŭ rehijonie, a tolki ŭzmacniajuć napružanaść i raspalvajuć nianaviść. Zaklikajem hramadzian nie paddavacca manipulacyjam. (…) Małdova zastajecca prychilnaj da prasoŭvańnia mirnaha dyjałohu i kanstruktyŭnaha supracoŭnictva, zasnavanaha na ŭzajemapavazie i zachavańni suvierenitetu i terytaryjalnaj cełasnaści dziaržaŭ», — zaklučyli ŭ ministerstvie.

• 11
• 1
• 3
• 8
• 1
• 1
• 3
• 0