Novy lidar Siryi raskazaŭ, jakim budzie ład u krainie, kali projduć vybary i jakija buduć adnosiny z Rasijaj

CHTŠ da hetaha času farmalna zabaroniena jak terarystyčnaja arhanizacyja ŭ mnohich krainach, u tym liku ŭ ZŠA i ŭ Rasii. Mienavita hety ruch uznačaliŭ vajennyja dziejańni, jakija pryviali da źviaržeńnia prezidenta Siryi Bašara Asada.

Maskva była najbližejšym sajuźnikam Asada, jaki na praciahu mnohich hadoŭ zastavaŭsia va ŭładzie šmat u čym dziakujučy padtrymcy rasijskaj armii, jakaja nanosiła ŭdary pa paŭstancach i siryjskich haradach. U Siryi znachodziacca rasijskija vajskovyja bazy, i kali paŭstanckija siły zachoplivali Damask, Asad źbieh mienavita ŭ Rasiju — pry dapamozie vojska RF.

Jak piša Bi-Bi-Si, ciapier novy ŭrad pad kiraŭnictvam al-Šaraa ŭstupiŭ u pieramovy z Maskvoj i nie patrabuje nieadkładnaha vyvadu ŭsich rasijskich sił.

«Rasija — važnaja kraina i ličycca druhoj pa mocy ŭ śviecie», — skazaŭ al-Šaraa ŭ intervju saudaŭskamu dziaržaŭnamu telekanału Al Arabiya (cytata pa ahienctvie AFP). Siryjski lidar dadaŭ, što Rasiju i Siryju źviazvajuć ahulnyja stratehičnyja intaresy.

«Usia siryjskaja zbroja maje rasijskaje pachodžańnie, i šmatlikimi elektrastancyjami kirujuć rasijskija ekśpierty. My nie chočam, kab Rasija sychodziła ź Siryi tak, jak chočuć niekatoryja», — zajaviŭ al-Šaraa.

U niadzielu ministr zamiežnych spraŭ Rasii Siarhiej Łaŭroŭ skazaŭ u intervju dziaržaŭnamu ahienctvu «RIA Novosti», što los rasijskich baz moh by stać pradmietam pierahavoraŭ z novymi ŭładami Siryi.

«Havorka idzie nie tolki ab zachavańni našych baz abo apornych punktaŭ, ale i ab umovach ich funkcyjanavańnia, źmiestu i zabieśpiačeńnia, uzajemadziejańnia ź miascovym bokam», — zajaviŭ Łaŭroŭ ab budučych pieramovach.

Vybary, kanstytucyja i rospusk CHTŠ

Lidar CHTŠ, jaki ŭ minułym byŭ viadomy jak Abu Machamied al-Džułani, ale admoviŭsia ad hetaj padpolnaj mianuški, upieršyniu paśla prychodu da ŭłady skazaŭ, kali ŭ Siryi mohuć adbycca vybary.

«Vybarčy praces moža zaniać čatyry hady», — vykazaŭ mierkavańnie lidar krainy, rastłumačyŭšy, što dla arhanizacyi hałasavańnia jašče nieabchodna adnavić jurydyčnuju sistemu i pravieści paŭnacenny pierapis nasielnictva Siryi.

Al-Šaraa taksama skazaŭ, što stvareńnie novaj kanstytucyi krainy moža zaniać da troch hadoŭ, a dla značnaha palapšeńnia pracy dziaržaŭnych instytutaŭ novym uładam spatrebicca kala hoda.

Pa słovach al-Šaraa, jaho hrupoŭka budzie raspuščana na budučaj kanfierencyi, dzie pačniecca dyjałoh pamiž roznymi častkami siryjskaha hramadstva. Jon nie ŭdakładniŭ, što mienavita heta značyć i jak budzie adbyvacca rospusk.

CHTŠ raniej była źviazana z «Isłamskaj dziaržavaj» i «Al-Kaidaj», jakija mnohija krainy śvietu ličać terarystyčnymi arhanizacyjami. Adnak zaraz uzbrojeny ruch na čale z al-Šaraa razarvaŭ ź imi suviazi i zajaŭlaje ab namiery zabiaśpiečyć pravy mienšaściaŭ i prytrymlivacca ŭmieranaj ideałohii.

Jak pieradaje blizkaŭschodni ahladalnik Bi-bi-si, zaprašeńni na siryjskuju kanfierencyju byli adpraŭlenyja roznym palitykam i pradstaŭnikam supołak krainy, a taksama hramadzianskaj supolnaści, u tym liku aktyvistam, jakija adstojvajuć pravy žančyn.

Kanfierencyja stanie pieršaj mahčymaściu pravieryć, ci sapraŭdy novyja ŭłady Siryi majuć namier vykanać svaje abiacańni pa abjadnańni Siryi.

CHTŠ stvaryŭ novy pierachodny ŭrad Siryi vyklučna sa svaich pradstaŭnikoŭ, i niekatoryja pačali krytykavać jaje za toje, što ŭ kabiniet nie patrapili pradstaŭniki inšych frakcyj. U adkaz na hetuju krytyku al-Šaraa skazaŭ, što pryznačyŭ tolki asnoŭnych čalcoŭ urada i nie maje namieru kaho-niebudź dyskryminavać.

Nasielnictva Siryi składajecca z mnostva etničnych i relihijnych hrup, u tym liku kurdaŭ, armian, asiryjcaŭ, chryścijan, druzaŭ, ałavitaŭ-šyitaŭ i arabaŭ-sunitaŭ. Apošnija składajuć bolšaść u krainie.

U intervju Al Arabiya al-Šaraa taksama paabiacaŭ, što rehijanalnyja siły na čale z kurdami stanuć častkaj nacyjanalnaj siryjskaj armii. «Zbroja pavinna być tolki ŭ rukach dziaržavy. My budziem vitać luboha, chto ŭzbrojeny i maje dastatkovuju kvalifikacyju, kab dałučycca da Ministerstva abarony», — skazaŭ jon.

Tym časam, pavodle źviestak Siryjskaha centra manitorynhu za vykanańniem pravoŭ čałavieka (SOHR), jaki bazujecca ŭ Brytanii, za apošni tydzień u Siryi byli aryštavanyja kala 300 čałaviek, jakich padazrajuć u ciesnych suviaziach z režymam Asada.

U liku zatrymanych danosčyki, bajcy praŭradavych farmavańniaŭ i byłyja vajskoŭcy, paviedamlaje SOHR. Pavodle źviestak arhanizacyi, hetyja aryšty adbyvalisia «pry sadziejničańni miascovaha nasielnictva».

• 6
• 6
• 2
• 5
• 1
• 0
• 0
• 2