Kamanda prezidenta Uładzimira Zialenskaha dakładna raźvitajecca z brendam «Słuha naroda» da budučych vybaraŭ. Jon daŭno siabie vyčarpaŭ i navat staŭ adkryta taksičnym, piša RBK-Ukraina.
Pavodle krynic vydańnia, na vybary, kali b jany ni adbylisia, ciapierašniaja partyja ŭłady pojdzie ŭ składzie ŭmoŭnaha «Błoku Zialenskaha» (rabočaja nazva), jaki, pavodle roznych apytańniaŭ, nabiraje kala 20%.
Kiraŭnikom takoj abnoŭlenaj partyi moža stać vice-premjer Michaił Fiodaraŭ. Jak adznačyli niekalki krynic RBK-Ukraina, zaraz heta hałoŭny kandydat, jaki moža pavieści partyju Zialenskaha na vybary. Adnak usie hetyja idei pakul na vielmi rańnim etapie.
U kamandzie prezidenta prahnazujuć, što novy skład buduć farmavać ź ludziej, prapanavanych Zialenskim — miascovych lidaraŭ (asobnych meraŭ abo kiraŭnikoŭ AVA), papularnych vałancioraŭ, błohieraŭ, aktyvistaŭ i vajskoŭcaŭ. Plus častka «technaroŭ» — ludziej kiraŭnika AP Andreja Jermaka, na jakich uskładuć rolu mieniedžaraŭ u frakcyi i partyi.
«Ale ŭ hety raz da składu buduć padychodzić napeŭna bolš surjozna, a nie tak, jak u minuły raz, kab paźbiehnuć tych chvarob, jakija zdarylisia ŭ hetym sklikańni», — raspaviała adna z krynic.
Nahadajem, na daterminovych parłamienckich vybarach u lipieni 2019 hoda partyja Uładzimira Zialenskaha atrymała bolšaść miescaŭ u parłamiencie i samastojna sfarmavała kaalicyju i ŭrad. Manabolšaść dziejničaje da siońniašniaha dnia.
Ale hałoŭnaje, da ciapierašniaha času nie viadoma, ci pojdzie na vybary sam Zialenski. Mnohaje budzie zaležać ad taho, na jakich umovach skončycca vajna, jak hetyja ŭmovy ŭsprymie hramadstva i chto stanie hałoŭnym kankurentam Zialenskaha.
Kamientary