Litoŭskaja firma mahła tajemna sačyć za amierykanskimi vajskoŭcami ŭ Jeŭropie i pradavać ich danyja trecim asobam

U minułym hodzie mižnarodnaje žurnalisckaje rasśledavańnie vyjaviła, što amierykanskaja kampanija-brokier Datastream Group pradavała vielmi adčuvalnyja danyja ab miescaznachodžańni amierykanskich vajskoŭcaŭ i śpiecsłužboŭcaŭ u Jeŭropie. Na toj momant zastavałasia nieviadomym, chto źjaŭlaŭsia krynicaj infarmacyi dla brokiera, adnak ciapier vyśvietliłasia, što danyja pastupali ad litoŭskaj firmy Eskimi, jakaja śpiecyjalizujecca na ličbavaj rekłamie, paviedamlaje vydańnie Wired.

Vydańnie adznačaje, što infarmacyju paćvierdziła sama Datastream Group u svaim adkazie na zakryty list sienatara ZŠA Rona Uajdena, jaki zapatrabavaŭ ad brokiera raskryć pastaŭščyka danych.

Pavodle pierapiski, litoŭskaja firma Eskimi pradała Datastream Group 11 miljonaŭ unikalnych rekłamnych identyfikataraŭ, jakija źviazanyja z mabilnymi pryładami karystalnikaŭ. Hetyja identyfikatary źbirajucca praz prahramnyja moduli SDK (software development kit), ubudavanyja ŭ mabilnyja dadatki z metaj zboru analityčnych danych ab tym, chto vy, što vy robicie i dzie znachodziciesia (dla nastupnaj piersanalizacyi rekłamy). Hetyja danyja nie ŭtrymlivajuć imionaŭ, ale ich možna vyznačyć, supastaviŭšy atrymanyja źviestki ź infarmacyjaj z sacsietak i inšych adkrytych krynic u internecie.

Asobnaja častka pradadzienych litoŭskaj kampanijaj Eskimi identyfikataraŭ tyčyłasia amierykanskich raźviedčykaŭ i vajskoŭcaŭ, raźmieščanych na bazach u Hiermanii, dzie, jak miarkujecca, znachodzicca i amierykanskaja jadziernaja zbroja, piša Wired.

Ministerstva abarony ZŠA pakul nie nijak nie kamientavała dadzienuju situacyju, ale pres-słužba viedamstva niadaŭna adznačyła, što hieałakacyjnyja servisy mohuć stvarać pahrozu dla vajskoŭcaŭ i tamu im varta stroha prytrymlivacca praviłaŭ apieratyŭnaj biaśpieki.

Na fonie hetaha Dziaržaŭnaja inśpiekcyja Litvy pa abaronie danych paviedamiła, što ŭžo źbiraje infarmacyju pra dziejnaść kampanii Eskimi. Kali kampanija sapraŭdy zamiašanaja ŭ tajemnym handli pryvatnymi danymi, to joj moža pahražać štraf da 20 miljonaŭ jeŭra.

Kiraŭnictva Eskimi, u svaju čarhu, zajaviła vydańniu Wired, što ich kampanija nikoli nie supracoŭničała z amierykanskim brokieram Datastream Group i što Eskimi nie handluje pryvatnymi danymi karystalnikaŭ. Ale pry hetym Eskimi źjaŭlajecca partnioram Google u prahramie Authorized Buyer, što dazvalaje litoŭskaj kampanii ŭdzielničać u aŭkcyjonach na rekłamnyja miescy i vykarystoŭvać danyja karystalnikaŭ dla piersanalizacyi rekłamy, padkreślivaje Wired.

Eskimi supracoŭničaje z bujnymi i maleńkimi brendami z bolš jak 30 krain, u tym liku ź biełaruskimi i rasijskimi biznesami.

• 1
• 0
• 3
• 5
• 1
• 0
• 2
• 0