Alaksandr Łukašenka pryznačyŭ staršynioj kamisii pa spravie farmavańnia novaha ŭrada kiraŭnika svajoj administracyi Dźmitryja Krutoha. Što aznačaje hetaje pryznačeńnie, piša ŭ svaim błohu na sajcie «Radyjo Svaboda» Juryj Drakachrust.
U savieckija časy kremlenołahi, zachodnija ekśpierty ŭ spravach SSSR vyznačali ijerarchiju členaŭ Palitbiuro adpaviedna ich miescam na trybunie Maŭzaleja na śviatkavańni 7 listapada ŭ Maskvie: chto staić bližej da hienieralnaha sakratara, toj maje bolšuju palityčnuju vahu.
Zaraz, kali Alaksandr Łukašenka pryznačyŭ staršynioj kamisii dla farmavańnia novaha ŭrada kiraŭnika svajoj administracyi Dźmitryja Krutoha, stała zrazumieła, što Kruty ciapier zajmaje na «trybunie Maŭzaleja» asablivaje miesca. Sama hetaja kamisija — instytut davoli dziŭny. Pierad pryznačeńniem papiarednich premjeraŭ Łukašenka takich orhanaŭ publična nikoli nie stvaraŭ.
Tut jasnyja dźvie rečy. Pieršaja — što kančatkovaje rašeńnie pra toje, chto ŭznačalić urad, budzie prymać Łukašenka, jak i raniej prymaŭ. Druhaja — što ŭ kožnaj biurakratyčnaj sistemie padobnyja važnyja pryznačeńni prynamsi abmiarkoŭvajucca z kołam najvyšejšych čynoŭnikaŭ. Inšymi słovami, niejkaja niefarmalnaja kamisija zaŭsiody jość.
Pytańnie: navošta hetym razam jaje stvaryli farmalna, publična, dy jašče i z pryznačeńniem staršyni? I hety staršynia — nie Łukašenka, što było b naturalna.
Tak vyhladaje, što hetaja kamisija — anałah trybuny Maŭzaleja ŭ savieckija časy, karcinki, jakaja dakładna vyznačaje ijerarchiju miescaŭ u kiraŭnictvie režymu.
I pryznačeńnie staršynioj kamisii Krutoha — demanstracyja i namienkłatury, i hramadstvu, što mienavita hetaja asoba ciapier — druhi numar. Jon toj, chto raić Łukašenku, kaho pryznačyć premjeram. Značyć, jon staić vyšej za hetaha budučaha premjera, kim by toj ni byŭ. Možna sabie ŭjavić, jakija niabačnyja aparatnyja bitvy adbyvalisia za miesca na čale hetaj kamisii.
Pavodle Kanstytucyi, pierajemnik Łukašenki ŭ vypadku jaho sychodu — staršynia Savieta Respubliki. Łukašenka apošnim časam Natallu Kačanavu nachvalvaŭ, raskazvaŭ, što mienavita jana ledź nie prymusiła jaho pajści na sioletnija vybary. Ale pryznačyŭ «tvorcam premjeraŭ» nie jaje, a jaje kankurenta.
Stvareńnie kamisii dla farmavańnia ŭrada śviedčyć chutčej pra toje, što Raman Hałoŭčanka premjeram nie zastaniecca. Navošta razvodzić takuju burnuju dziejnaść, kab prosta pierapryznačyć jaho?
Šaniec, što jon usio ž zachavaje pasadu, zastajecca. Ale, mahčyma, atrymaŭšy ŭ namieśniki mocnuju fihuru, jakaja skancentruje paŭnamoctvy. A na Hałoŭčanku zastaniecca adkaznaść za mahčymaje paharšeńnie ekanamičnaha stanu.
Ale ŭ kožnym razie — zastaniecca Hałoŭčanka ci pryznačać premjeram novuju asobu — nad im budzie jašče adzin pavierch padparadkavańnia: staršynia kamisii ŭ spravie farmavańnia ŭrada.
Łukašenka, pačynajučy z navahodniaha zvarotu, niekalki razoŭ kazaŭ pra pierajemnaść, prychod novaha pakaleńnia. Na pres-kanfierencyi 26 studzienia jon tłumačyŭ, što havorka nie idzie pra prychod hetaha novaha pakaleńnia na jaho miesca ci, prynamsi, nie pra chutki prychod.
Ale i samo stvareńnie kamisii, i pryznačeńnie jaje staršynioj nie samoha siabie moža być nievialikim krokam u kirunku tranzitu ŭłady. Toj tranzit nie kaniečnie ž pavinien rabicca adnym uračystym abviaščeńniem i zaćviardžeńniem aficyjnaha pierajemnika.
Moža rabicca i spakvala, takimi voś manieŭrami ŭ vizantyjskim styli. Jak by naŭprost ničoha nie havorycca. Ale ŭsim robicca zrazumiełym, za kim zamacavanaje druhoje miesca na toj «trybunie Maŭzaleja».
Kamientary