Pažyćciova źniavoleny kiraŭnik Rabočaj partyi Kurdystana zaklikaŭ paplečnikaŭ skłaści zbroju
Lidar Rabočaj partyi Kurdystana Abduła Adžałan, jaki ŭžo bolš za čverć stahodździa znachodzicca ŭ tureckim źniavoleńni, vypuściŭ zvarot, u jakim zaklikaŭ svaich prychilnikaŭ spynić uzbrojenuju baraćbu suprać tureckaj dziaržavy i skłaści zbroju. Jaho zajavu začytali pradstaŭniki prakurdskaj partyi «Roŭnaści narodaŭ i demakratyi».
U dakumiencie ad imia Adžałana zajaŭlajecca, što «patrabavańnie niezaležnaha Kurdystana ci navat aŭtanomii bolš nie aktualnyja».
«Ja zaklikaju [svaich prychilnikaŭ] skłaści zbroju i biaru na siabie histaryčnuju adkaznaść za hety zaklik. Usie hrupy pavinny skłaści zbroju, a RPK pavinna samaraspuścicca […] Hałoŭnaje ciapier — umacavańnie demakratyi i palityčnaha pluralizmu ŭ ramkach Tureckaj Respubliki», — zajaviŭ palityk.
Lidar uzbrojenaha kryła RPK Murat Karajyłan admoviŭsia padparadkoŭvacca zakliku Adžałana. Pavodle jahonych słoŭ, kurdy z dapamohaj zbroi abaraniajuć siabie, a spynieńnie ahniu pavinna być dvuchbakovym.
Abduła Adžałan zasnavaŭ Rabočuju partyju Kurdystana ŭ 1978 hodzie. Ź siaredziny 1980-ch arhanizacyja viadzie baraćbu suprać Turcyi. Za minułyja dziesiacihodździ prychilniki partyi adyšli ad idei poŭnaj niezaležnaści Kurdystana na karyść kulturnaj aŭtanomii i «demakratyčnaj transfarmacyi» Tureckaj Respubliki. Usiaho ŭ kanflikcie RPK i Turcyi zahinuli bolš za 40 tysiač čałaviek.
Sam Abduła Adžałan byŭ aryštavany tureckimi ŭładami ŭ 1999 hodzie i ciapier adbyvaje vyniesieny jamu pažyćciovy prysud u turmie na vostravie Imrały ŭ Marmurovym mory.
Kamientary