Za parušeńnie dziaržaŭnych sakretaŭ sudziać pahraničnika z bazy «Miratvorca», jaki pajšoŭ u IT i zasiadaŭ u Vaskrasienskaha
35-hadovamu Rusłanu Javicu pahražaje da 5 hadoŭ kałonii.
U Minskim haradskim sudzie pačynajuć sudzić 35-hadovaha Rusłana Javicu. Jamu staviać u vinu «parušeńnie patrabavańniaŭ pa abaronie dziaržaŭnych sakretaŭ, jakoje pryviało da ciažkich nastupstvaŭ» (č.2 art. 375-2 Kryminalnaha kodeksa). Heta vielmi redki artykuł, ale zrazumieć, što inkryminujecca Javicu, budzie składana, bo praces zrabili zakrytym. Jaho bijahrafija taksama nie pralivaje śviatło na situacyju.
Raniej Javica byŭ načalnikam adździeła vajskovaj čaści v/č 1250 (farmalna znachodzicca ŭ Minsku, ale ŭ jaho była bresckaja prapiska). «Biełpoł» paćvierdziŭ «Našaj Nivie», što ŭ Biełarusi jość tolki adzin čałaviek z takimi inicyjałami.
«Vajskovaja čaść 1250 — heta taja samaja čaść, dzie bazirujecca ASAM (Asobnaja słužba aktyŭnych mierapryjemstvaŭ), napeŭna, samaje tajnaje sa śpiecpadraździaleńniaŭ Biełarusi, tamu što nichto tołkam nie viedaje, čym jano zajmajecca. Farmalna — asabliva niebiaśpiečnaj pamiežnaj złačynnaściu. Ale pakolki miežy Biełarusi da apošniaha času byli spakojnyja, to možna mierkavać, što heta śpiecpadraździaleńnie zajmajecca praviadzieńniem dyviersij», — z takoj matyvacyjaj Javicu ŭ 2022-m uklučyli ŭ «Miratvorac», bazu vorahaŭ Ukrainy, i abvieścili «rasijskim dyviersantam».
Najchutčej, ukraincy skarystalisia starymi bazami. Na toj momant Javica ŭžo pakinuŭ słužbu i pajšoŭ u IT-śfieru.
U 2021-m jon pisaŭ zapyt u jurydyčnuju kansultacyju, u jakim paviedamlaŭ, što niejkaja kampanija, da jakoj jon maje dačynieńnie, zaprošanaja ŭ jakaści rezidenta svabodnaj ekanamičnaj zony «Inapolis» u Tatarstanie.
Aproč taho, Javica pracuje jak vykładčyk i biznes-trenier.
«Praktykujučy prajektny mieniedžar z vopytam pracy ŭ IT bolš za 6 hadoŭ. Pracuje z rynkami SND i Jeŭropy. Na hety momant asnoŭnaja dziejnaść źviazana z prajektami ŭ realizacyi mabilnaj raspracoŭki i skrynačnych finansava-techničnych prajektaŭ», — havorycca ŭ prezientacyi «Akademii Biełchard». Javica čytaje tut kurs «2 u 1: Biznes-analiz i kiravańnie prajektami ŭ IT».
Treciaja aktyŭnaść pamiežnika-ajcišnika — aktyŭnaść u kruhłych stałach Juryja Vaskrasienskaha, jakija prachodzili ŭ pačatku 2021 hoda. Na hetym fota Rusłan Javica ŭ biełaj kašuli padčas dyskusii pra Usiebiełaruski narodny schod.
Na jakim etapie žyćcia jon parušyŭ dziaržaŭnyja sakrety i jak pra heta daviedalisia, niezrazumieła. Sud nad im pačniecca 14 sakavika 2025. Javicu pahražaje da 5 hadoŭ chimii albo da 5 hadoŭ kałonii. Da suda jon znachodzicca na svabodzie.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary