Stała viadoma, jak Kreml załahodziŭ kanflikt z Baku za źbity rasijanami azierbajdžanski łajnier

U aŭtorak, 4 sakavika, stała viadoma pra zakładku ŭ Maskvie pomnika pieršamu prezidentu Azierbajdžana Hiejdaru Alijevu i pra pačatak vypłat pasažyram łajniera Embraer 190, jaki raźbiŭsia pad Aktau. Źviazany z Kramlom palitołah Siarhiej Markaŭ zajaviŭ, što takim čynam Maskva załahodziła kanflikt z Azierbajdžanam praz katastrofu, da jakoj pryvioŭ udar pa samalocie rasijskaj SPA ŭ niebie nad Hroznym. Ci budzie Baku paśla hetaha ličyć usie svaje patrabavańni da Rasii vykananymi, pakul nie zrazumieła.

Pomnik baćku ciapierašniaha prezidenta Azierbajdžana Ilchama Alijeva zakłali ŭ aŭtorak u skviery pry pasolstvie Azierbajdžana. Pomnik budzie ŭstalavany «za vydatny ŭkład u budoŭlu BAM». Mer Maskvy Siarhiej Sabianin u siužecie raspavioŭ, što z prośbaj pastavić pomnik Alijevu «źviarnułasia Sadružnaść budaŭnikoŭ BAMa». U aficyjnaj ža bijahrafii na sajcie prezidenta Azierbajdžana BAM i rola ŭ jaho budaŭnictvie Alijeva nijak nie zhadvajecca.

Vypłačvać kampiensacyi za škodu pasažyram łajniera kampanii AZAL pačała kampanija «Alfastrachovanije», paviedamiŭ u aŭtorak «Interfaks». U natatcy taksama havorycca, što ŭ kampanii dastatkova infarmacyi dla arhanizacyi vypłat da zaviaršeńnia aficyjnaha rasśledavańnia katastrofy. 

A na minułym tydni kiraŭnik Čačni Ramzan Kadyraŭ paviedamiŭ ab rašeńni ŭznaharodzić acalełych členaŭ ekipaža — bortpravadnika Zulfuhara Asadava i ściuardesu Ajdan Rahimli — uznaharodami «za zasłuhi pierad Čačenskaj Respublikaj» i ŭstalavać u Hroznym miemaryjalnuju plitu ŭ pamiać ab achviarach katastrofy.

Adkryćcio pomnika Alijevu, rašeńnie Kadyrava, vypłaty strachoŭki, admova Azierbajdžana hałasavać «za antyrasijskuju rezalucyju AAN» (na minułym tydni Baku nie hałasavaŭ pa rezalucyjach ab vajnie va Ukrainie ŭ Hienasamblei AAN), a taksama adsutnaść u azierbajdžanskich i rasijskich praŭładnych ŚMI niehatyŭnaha aśviatleńnia krain, na dumku Markava, śviedčyć ab «pieraadoleńni kryzisu» ŭ adnosinach Maskvy i Baku.

Baku pakul nie kamientavaŭ apošnija padziei. Pry hetym azierbajdžanskija ŚMI aktyŭna aśviatlali zakładku pomnika Alijevu i vypłaty «Alfastrachovanija».

Raniej prezident Azierbajdžana patrabavaŭ, kab Rasija pryznała, što łajnier byŭ źbity rasijskaj SPA, vybačyłasia pierad Azierbajdžanam, pakarała vinavatych va ŭdary pa łajniery i daniesła pryčyny katastrofy da hramadskaści.

Samalot Embraer 190 avijakampanii Azerbaijan Airlines, jaki nie zmoh sieści ŭ Hroznym, raźbiŭsia pobač z Aktau 25 śniežnia. Papiaredniaje rasśledavańnie katastrofy pakazała, što jon byŭ źbity rasijskaj rakietaj (padčas sproby sieści ŭ stalicy Čačni samalot padvierhnuŭsia napadu bieśpiłotnikaŭ).

Rasijskaja prapahanda zamoŭčvała źviestki pra trapleńnie ŭ samalot rakietaj SPA. Zamiest hetaha rasijskija ŚMI pierakazvali zajavy Rasavijacyi, jakaja paviedamiła, što razhladajecca sutyknieńnie z ptuškami ŭ jakaści asnoŭnaj viersii.

Na fonie kryzisu ŭ adnosinach z Rasijaj u Baku było pryniata rašeńnie ab zakryćci «Ruskaha doma», a taksama ab likvidacyi pradstaŭnictva ŭ Azierbajdžanie, jakoje ŭvachodzić u Rasijskuju dziaržaŭnuju miedyjahrupu «Rośsija siehodnia» radyjo «Sputnik».

• 9
• 4
• 3
• 34
• 1
• 0
• 4
• 0