Prasoŭvańnie rasijskich vajskoŭcaŭ va Ukrainie praktyčna spyniłasia
Tempy rasijskaha nastupleńnia na froncie va Ukrainie druhi tydzień zapar zastajucca minimalnymi za hod.
Rasijskija vajskoŭcy praktyčna pierastali prasoŭvacca na froncie va Ukrainie. Za minuły tydzień rasijskim vajskoŭcam udałosia zachapić 14,4 kvadratnych kiłamietraŭ terytoryi, a tydniem raniej — 12,9 kv km.
Za minuły tydzień (3-9 sakavika) bolš za ŭsio terytoryi (12,4 kv km) rasijskija vajskoŭcy zachapili ŭ rajonie Svatava Łuhanskaj vobłaści. Na hetaj terytoryi, zhodna z kartaj DeepState, nie było nasielenych punktaŭ.
Jašče 2,4 kv km Rasii ŭdałosia zachapić na poŭdni Danieckaj vobłaści, u rajonie vioski Pryvolnaje (9 km na zachad ad Vialikaj Navasiołki). Pry hetym za toj ža pieryjad Rasija straciła kantrol prykładna nad 0,5 kv km u rajonie vioski Piasčanaje prykładna za 7 km ad Pakroŭska Danieckaj vobłaści, vyśvietliła «Ahienctva».
Tydniem raniej (24 lutaha — 2 sakavika) asnoŭnaje prasoŭvańnie rasijskich vajskoŭcaŭ (13,3 kv km) było zafiksavana na poŭdni Danieckaj vobłaści, dzie byŭ zachopleny pasiołak Burłackaje. Jašče 2,5 kv km terytoryi Rasija zachapiła ŭ rajonie vioski Załataroŭka Łuhanskaj vobłaści (prykładna 15 km na zachad ad Lisičanska). Za toj ža pieryjad Rasija straciła kala 3 kv km na inšych učastkach frontu. Apošni raz mienš za 15 kv km za tydzień Rasija zachapiła va Ukrainie ŭ krasaviku 2024 hoda.
Rasijskaje nastupleńnie ŭ Danieckaj vobłaści spyniłasia z-za drennaha nadvorja, źniasileńnia rasijskich sił i efiektyŭnaj adaptacyi USU da rasijskich mietadaŭ viadzieńnia boju, skazaŭ The New York Times staršy navukovy supracoŭnik Fondu Karniehi Majkł Kofman. Pa jaho słovach, choć pakul rana kazać pra stabilizacyju frontu, situacyja dla Ukrainy palapšajecca.
U toj ža čas ukrainskija vajskoŭcy, jakija razmaŭlali z žurnalistami haziety, čakajuć pierahrupiroŭki rasijskich vajskoŭcaŭ i novaha nastupleńnia, pakolki Rasija moža skarystacca spynieńniem amierykanskaj vajennaj dapamohi.
Paśla spynieńnia rasijskaha nastupleńnia USU zmahli viarnuć sabie niekatoryja vyhadnyja pazicyi dla abarony Pakroŭska, jaki staŭ adnoj z hałoŭnych metaŭ rasijskaj armii, raskazali ŭkrainskija vajskoŭcy NYT. Taksama ŭkrainskija vajskoŭcy, pa ich ułasnych słovach, prasoŭvajucca ŭ haradskich bajach u Tarecku. OSINT-analityki i Z-vajenkory ŭ pačatku sakavika paviedamlali, što USU zmahli viarnucca ŭ centr Tarecka i stvaryć pahrozu akružeńnia dla rasijskaj hrupoŭki.
Spynieńnie prasoŭvańnia va Ukrainie supała pa časie z aktyvizacyjaj rasijskich apieracyj u Kurskaj vobłaści. Za apošni tydzień (z 2 sakavika) u hetym rasijskim rehijonie USU stracili kantrol prykładna nad 25% zachoplenaj terytoryi.
Rasijskaje nastupleńnie ŭ Danieckaj vobłaści nabrała abaroty ŭ žniŭni minułaha hoda, kali Ukraina pierakinuła tysiačy svaich samych zahartavanych u bajach vajskoŭcaŭ u Kurskuju vobłaść. Ukraina spadziavałasia, što ŭvarvańnie prymusić Kreml pierakinuć resursy z Danieckaj vobłaści, ale tady hetaha nie adbyłosia. U listapadzie rasijskija vajskoŭcy prasoŭvalisia va Ukrainie rekordnymi tempami, adnak da kanca 2024 — pačatku 2025 hoda tempy nastupleńnia pačali skaračacca i ciapier upali amal da nula.
Kamientary
Tamu i zahałasili:
"Ukraina nie choča miru!"