Niekalki dziasiatkaŭ ukrainskich bieśpiłotnikaŭ atakavali Maskvu i Padmaskoŭje
Mer Maskvy Siarhiej Sabianin zajaviŭ, što źbili ŭžo 79 bieśpiłotnikaŭ.
Jak paviedamlajuć rasijskija ŚMI i telehram-kanały, u vyniku ataki i padzieńnia abłomkaŭ u niekalkich miescach zafiksavanyja paškodžańni.
U pryvatnaści, pavodle ich źviestak, abłomki dronaŭ trapili ŭ šmatpaviarchovik na Damadziedaŭskaj vulicy ŭ Maskvie, u rajonie čyhunačnaj stancyi «Damadziedava», na parkoŭku ŭ horadzie Damadziedava, u žyłyja damy ŭ horadzie Vidnaje, a taksama ŭ Ramienskim.
Taksama zaharełasia parkoŭka «Miratorha» ŭ Damadziedavie.
U aeraporcie Unukava taksama ŭviedzieny režym «Dyvan». Rejsy na vylet i prylot zatrymanyja.
Raniej paviedamlałasia pra ŭviadzieńnie abmiežavańniaŭ u aeraportach Šaramiećcieva, Žukoŭski i Damadziedava.
Vidavočcy paviedamlajuć pra paškodžańnie čyhunačnych šlachoŭ u vyniku ataki bieśpiłotnikaŭ u Padmaskoŭi. Niekatoryja elektryčki admienieny.
Adzin čałaviek zahinuŭ i troje atrymali ranieńni ŭ Leninskaj haradskoj akruzie Maskoŭskaj vobłaści, paviedamiŭ hubiernatar rehijona Andrej Varabjoŭ.
«Taksama abłomki bieśpiłotnikaŭ upali na šmatkvaterny dom u Ramienskim, dzie paškodžany jak minimum siem kvater z 19-ha pa 22-hi pavierchi doma na Paŭnočnym šase. Ź ich evakujavanyja 12 čałaviek, u tym liku troje dziaciej. Miedyki akazali dapamohu paciarpiełym na miescy. Častku evakujavanych raźmiaścili ŭ susiedniaj himnazii, astatnija znachodziacca ciapier u svajakoŭ», — napisaŭ jon u telehramie.
Pavodle Varabjova, usiaho było źbita bolš za 60 bieśpiłotnikaŭ.
Kamientary