U Hrenłandyi — vybary. Ci dapamohuć jany Donaldu Trampu anieksavać hihancki vostraŭ?

Tramp kaža, što hatovy nabyć ci navat zabrać siłaj aŭtanomnuju arktyčnuju terytoryju Danii — člena ES i sajuźnika ZŠA pa NATA.

Trampa spakušaje abaronnaje i ekanamičnaje značeńnie vostrava. Praz Hrenłandyju pralahaje najkaraciejšy šlach ź Jeŭropy ŭ Paŭnočnuju Amieryku, la jaje bierahoŭ davoli šmat ryby, a nietry bahatyja karysnymi vykapniami, chaj i ciažkadastupnymi.

Hrenłandcy daŭno zaikajucca ab niezaležnaści. Vybary, jakija prachodziać u aŭtorak, pakažuć, nakolki tryvałyja viekavyja puty, jakija źviazvajuć arktyčny vostraŭ z Danijaj, i jak jaho nasielnictva i palityki źbirajucca razyhrać kozyr, jaki niečakana vypaŭ im u stratehičnym supraćstajańni novaj Amieryki Trampa sa staroj Jeŭropaj.

Staraja zaležnaść lepšaja za dźvie novyja

Hrenłandcy padtrymlivajuć niezaležnaść ad Danii, pakolki im niepryjemna być faktyčna kałonijaj, niachaj i vielmi aŭtanomnaj.

Uładu nad unutranymi spravami Danija daŭno sastupiła Hrenłandyi, ale praciahvaje apłačvać biaspłatnuju adukacyju i achovu zdaroŭja. Abarona i źniešniaja palityka zastajucca ŭ padparadkavańni Kapienhahiena.

Danija štohod pieraličvaje amal 600 młn jeŭra, i tym samym pakryvaje dobruju pałovu vydatkaŭ hrenłandskaj kazny.

Pavodle apošnich apytańniaŭ, za niezaležnaść vystupajuć bolš za 80% žycharoŭ vostrava, adnak na razvod biez utrymańnia hatovyja mienš za pałovu.

«Nichto nie točyć nažy i nie kryčyć «Niezaležnaść! niezaležnaść!», — apisvaje situacyju pierad vybarami suśvietna viadomy hrenłandski hieołah Minik Rosinh. — Ludzi abmiarkoŭvajuć achovu zdaroŭja, škoły, jaki mator na łodku pastavić, pa čym dyziel siońnia — zvyčajnyja spravy».

U parłamiencie bolšaść — u sieparatystaŭ. I sioletnija ŭłady abiacajuć u svoj čas pravieści refierendum ab niezaležnaści ad Danii. Adnak traplać u zaležnaść ad ZŠA, i tym bolš pry Donaldzie Trampie, hrenłandcy nie žadajuć.

«Hrenłandyja naležyć hrenłandcam, i heta treba danieści da amierykancaŭ, — skazaŭ pierad vybarami premjer-ministr Mucie Ehiede. — My zasłuhoŭvajem pavahi, ale ja nie ŭpeŭnieny, što amierykanski prezident jaje demanstruje».

«Mnie zdajecca, što ŭ śviatle pavodzinaŭ amierykanskaha prezidenta ŭ apošni čas žadańnia zbližacca z ZŠA ŭ ludziej pamienšyła», — skazaŭ jon u intervju dackamu hramadskamu radyjo DR.

Prychavanaja pahroza

Hrenłandcy hatovy atrymać vyhadu ź niečakanaj uvahi z boku bahatych zalotnikaŭ i abaroncaŭ, adnak aścierahajucca, što ich voźmuć padmanam.

Ułady zaniepakojenyja dezynfarmacyjaj u sacsietkach i pahrozaj podkupu vybarščykaŭ. U lutym parłamient zakonam zabaraniŭ palitykam prymać achviaravańni ad zamiežnikaŭ i ananimnych fundataraŭ.

Ciapier bolšaść u parłamiencie — 21 z 31 miesca — kantraluje kaalicyja partyj «Inuit Atakvatyhiit» («Narodnaja supolnaść») i «Siumut» («Napierad»). Jak piša ahienctva Bloomberg, abiedźvie vystupajuć za niezaležnaść, ale najbujniejšaja «Inuit Atakvatyhiit» nie śpiašajecca z refierendumam, a «Siumut» abiacaje pravieści jaho ŭ bližejšyja čatyry hady.

Ale navat kali prychilniki niezaležnaści ad usich – i ad Danii, i ad ZŠA — znoŭ pieramohuć na hetych vybarach, pahroza nie abminie.

Tramp admaŭlaŭsia vyklučać prymianieńnie siły dla kantrolu nad Hrenłandyjaj. Z ulikam jaho staŭleńnia da ŭvarvańnia Rasii va Ukrainu, taki varyjant raźvićcia padziej naściarožvaje datčan.

«Zajavy Trampa ab hatoŭnaści zachapić Hrenłandyju siłaj vielmi nahadvajuć rytoryku prezidenta Uładzimira Pucina ŭ dačynieńni da Ukrainy,

— skazaŭ Bi-bi-si Anders Foh Rasmusen, jaki pasłužyŭ i premjer-ministram Danii, i hienieralnym sakratarom NATA. — Ale ja chacieŭ by padkreślić, što mnie asabista zdajecca, što amierykancy nie pojduć na siłavy zachop Hrenłandyi».

• 5
• 0
• 1
• 5
• 2
• 1
• 0
• 0