Na vybarach u Hrenłandyi pieramahła partyja, jakaja vystupaje za sajuz z Danijaj
Pravacentrysckaja partyja Demokraatit atrymała najbolšuju kolkaść hałasoŭ na parłamienckich vybarach u Hrenłandyi, jakija prachodzili na fonie zajaŭ prezidenta ZŠA Donalda Trampa ab žadańni ŭziać vostraŭ pad kantrol.
Partyja Demokraatit vystupaje za zachavańnie suviaziaŭ z Danijaj i suprać pryśpiešanaha abviaščeńnia niezaležnaści vostrava. Jana nabrała 30% hałasoŭ.
Na druhim miescy z 25% apynułasia partyja Naleraq, jakaja vystupaje za niezaležnaść i ŭstalavańnie bolš ciesnych suviaziaŭ z ZŠA.
Pieramoha Demokraatit stała niečakanaj. Jana śviedčyć pra toje, što dla mnohich u Hrenłandyi nie mienš važnymi źjaŭlajucca achova zdaroŭja, adukacyja, kulturnaja spadčyna i inšaja sacyjalnaja palityka.
Partyja Ataqatigiit, jakuju ŭznačalvaje premjer-ministr Hrenłandyi Mucie Ehiede, i partyja Siumut, jakija składali ŭrad Hrenłandyi i daminavali ŭ palitycy vostrava apošnija hady, ciapier zaniali treciaje i čaćviortaje miescy adpaviedna. Jany sabrali 22 i 15% hałasoŭ.
Jašče 7% hałasoŭ atrymała partyja Atassut, jakaja vystupaje za sajuz z Danijaj, suprać niezaležnaści.
Ahułam partyi, jakija vystupajuć za sajuz z Danijaj ci niezaležnaść u sajuzie z Danijaj, sabrali 74% hałasoŭ.
Jak viadoma, Tramp vykazaŭ pierakanańnie, što Złučanyja Štaty «atrymajuć Hrenłandyju tak ci inakš». Jon paabiacaŭ zrabić hrenłandcaŭ bahatymi i padniać vostraŭ «da takich vyšyń, jakija vy nikoli nie ličyli mahčymymi raniej».
Premjer Hrenłandyi ŭ adkaz zajaviŭ, što prezident ZŠA pavinien zrazumieć, što hrenłandcy nie chočuć być amierykancami.
Kamientary