Nalot na kvateru ajcišnika: pahražajučy zbrojaj, patrabavali kryptavalutu na miljard rubloŭ
Dvoje mužčyn «atrymali infarmacyju», što ŭ minskaha ajcišnika jość bujnaja suma ŭ kryptavalucie, i vyrašyli pieravieści jaje na svoj kašalok. Dalej było jak u kino pra 90-ja hady.
Napad byŭ dniom 15 žniŭnia 2024 hoda: dvoje mužčyn u śpiecvopratcy pastukali ŭ dźviery 45-hadovaha prahramista i, nazvaŭšysia elektrykami, skazali, što treba pravieryć ličylniki.
Haspadar kvatery i padumać nie moh, što siarod biełaha dnia va ŭłasnaj kvatery stanie achviaraj razbojnaha napadu.
«Elektryki» nadzieli kajdanki na minčuka i stali patrabavać u jaho kryptavalutu na ahulnuju sumu bolš za miljard biełaruskich rubloŭ.
Dla bolš pierakanaŭčaj «razmovy» pahražali pistaletam, elektrašokieram, a taksama injekcyjaj narkatyčnych srodkaŭ.
Bolš za hadzinu mužčyny katavali haspadara kvatery, ale tak i nie damohšysia ničoha, źbiehli. Ničoha kaštoŭnaha z taho, što było ŭ kvatery, jany nie ŭziali. SK piša, što ŭ paciarpiełaha sapraŭdy była kryptavaluta, adnak nie ŭ takoj sumie, jakuju patrabavali fihuranty. U SK miarkujuć, što nalot byŭ zakazny.
Śledčyja ŭstanavili asoby vykanaŭcaŭ napadu, imi akazalisia hramadzianie Biełarusi, 56 i 57 hadoŭ, adzin ź jakich z kryminalnym minułym.
Siłaviki zatrymali 56-hadovaha vykanaŭcu razbojnaha napadu. Jon pryznaŭsia ŭ zroblenym i supracoŭničaje sa śledstvam. Mužčyna pakazaŭ miesca, dzie jany vykinuli zbroju. Z pryciahnieńniem vadałazaŭ śledčyja znajšli pnieŭmatyčny pistalet z hłušycielem, a taksama kajdanki.
Druhi mužčyna chavajecca za miažoj, pa viersii SK, u Polščy.
Zatrymanamu 56-hadovamu mužčynu pradjaŭlena abvinavačańnie pavodle:
• č. 3 art. 207 (razboj, učynieny hrupaj asob z metaj zavałodańnia majomaściu ŭ asabliva bujnym pamiery);
• č. 3 art. 208 (vymahalnictva, učynienaje z metaj atrymańnia majomasnaj vyhady ŭ asabliva bujnym pamiery).
Jamu pahražaje da 15 hadoŭ pazbaŭleńnia voli.
Kamientary