Dałaj-łama raspavioŭ u svajoj knizie, što jahony pierajemnik pavinien naradzicca za miežami Kitaja
Dałaj-łama napisaŭ u svajoj novaj knizie, što jahony pierajemnik pavinien naradzicca za miežami Kitaja, niahledziačy na toje, što ŭłady KNR zajaŭlajuć, što sami abiaruć nastupnaha duchoŭnaha lidara budystaŭ, piša Bi-bi-si.
U novaj knizie pad nazvaj Voice for the Voiceless («Hołas dla niamych»), apublikavanaj u aŭtorak, Dałaj-łama zajaviŭ, što, kab jahony pierajemnik zmoh vykanać svajo pryznačeńnie, jon pavinien naradzicca ŭ «volnym śviecie».
«Pakolki meta reinkarnacyi — praciahvać pracu papiarednika, novy Dałaj-łama narodzicca ŭ svabodnym śviecie, kab tradycyjnaja misija Dałaj-łamy — być hołasam usieahulnaha spačuvańnia, duchoŭnym lidaram tybieckaha budyzmu i simvałam Tybieta, jaki ŭvasablaje spadziavańni tybieckaha naroda, — praciahvałasia», — piša Dałaj-łama XIV.
Raniej jon zajaŭlaŭ, što moža pieraŭvasobicca tolki za miežami Tybieta, mahčyma, u paŭnočnaj Indyi, dzie žyvie ŭ vyhnańni z taho času, jak pakinuŭ svaju himałajskuju radzimu bolš za 60 hadoŭ tamu.
Raniej jon taksama kazaŭ, što na im moža skončycca čarha duchoŭnych lidaraŭ.
Kitaj śćviardžaje, što Tybiet źjaŭlajecca nieadjemnaj častkaj jahonaj terytoryi i nazyvaje ciapierašniaha Dałaj-łamu XIV sieparatystam.
«14-y Dałaj-łama — palityčny vyhnańnik, jaki zajmajecca antykitajskaj sieparatysckaj dziejnaściu pad prykryćciom relihii i nie maje prava pradstaŭlać tybiecki narod», — zajaviła pradstaŭnica MZS Kitaja Mao Nin.
14-y Dałaj-łama (jaho poŭnaje imia — Nhahvaanh Łovzanh Tenczin Hjamccho) źbieh u Indyju ŭ 1959 hodzie va ŭzroście 23 hadoŭ razam z tysiačami inšych tybietcaŭ paśla niaŭdałaha paŭstańnia suprać ułady Mao Czeduna.
Jahonyja paśladoŭniki zaniepakojenyja zdaroŭjem duchoŭnaha lidara budystaŭ, asabliva paśla pieraniesienaj im letaś apieracyi na kalenie. U śniežni Dałaj-łama zajaviŭ ahienctvu Reuters, što, mahčyma, dažyvie da 110 hadoŭ.
U svajoj knizie Dałaj-łama piša, što na praciahu bolš jak dziesiaci hadoŭ jon atrymlivaŭ šmatlikija prośby ad samych roznych tybietcaŭ, uklučajučy starejšych manachaŭ, jakija «adnadušna prasili mianie zabiaśpiečyć praciah rodu Dałaj-łam».
Pavodle tybieckaj tradycyi, duša starejšaha budyjskaha manacha paśla jahonaj śmierci pieraŭvasablajecca ŭ ciele dziciaci. Ciapierašni Dałaj-łama byŭ identyfikavany jak reinkarnacyja svajho papiarednika, kali jamu było dva hady.
U minułym miesiacy Piekin zajaviŭ, što Dałaj-łama zmoža «viarnucca na pravilny šlach» i hatovy abmiarkoŭvać jaho budučyniu pry vykanańni peŭnych umoŭ. Siarod ich — pryznańnie taho, što Tybiet i Tajvań źjaŭlajucca nieadjemnymi častkami Kitaja, adzinym zakonnym uradam jakoha źjaŭlajecca ŭrad KNR.
Hetaja prapanova była adchilenaja tybieckim parłamientam u vyhnańni ŭ Indyi.
«Jaho Śviataść nie moža chłusić, hetaha nie adbudziecca», — skazała kiraŭnica tybieckaha ŭrada Dałma Cerynh Tejkchanh ź indyjskaha horada Dcharamsała ŭ Himałajach, dzie taksama pražyvaje Dałaj-łama.
Kamientary