«NN» źviarnułasia da viadomych ludziej z pytańniem, jak jany śviatkujuć hety dzień.
25 Sakavika — dzień abviaščeńnia niezaležnaści Biełaruskaj Narodnaj Respubliki — adznačajecca jak śviata nacyjanalnaha vyzvaleńnia. «NN» źviarnułasia da viadomych ludziej z pytańniem, jak jany śviatkujuć hety dzień.
Mikałaj Čarhiniec, palityk‑łukašenkaviec:
Ja liču, što my pavinny adčuvać Dzień Voli kožny dzień, a nie tolki ŭ niejki adzin kankretny. Tamu i śviatkavać niejak asabliva nie varta. Uvohule, nie treba palityzavać i manapalizavać idei svabody i demakratyi. Ja padtrymlivaju raźvićcio demakratyi ŭ Biełarusi.
Da samich padziej 25 Sakavika 1918 hoda ŭ mianie padvojnaje staŭleńnie. Z adnaho boku, tyja ludzi prahnuli stvaryć niezaležnuju biełaruskuju dziaržavu. I heta varta vitać.Kali ŭ časy SSSR niešta vykidvali z padručnikaŭ, heta treba viarnuć.A ź inšaha, siońnia datu 25 Sakavika vykarystoŭvajuć u palityčnych metach.
Na historyju treba hladzieć, ničoha ź jaje nie vykidvajučy.
Treba, kab usio ŭ historyi naroda i krainy zastavałasia — i čornaje, i biełaje.
Lavon Volski, śpiavak:
Pakul niama kankretnych płanaŭ. Ale niešta prydumajem kreatyŭnaje. Uvohule ja liču, što
nam treba nabližacca da farmatu Dnia sv.Patryka. Treba iści ŭ masy, pazbaŭlać hetaje śviata palityzavanaści.
Alaksandr Fiaduta, palittechnołah:
25 Sakavika ja budu ŭ Varšavie na sustrečy z Adamam Michnikam, hałoŭnym redaktaram «Haziety Vyborčaj», a taksama vialikim siabram Biełarusi. Siadziem dzie‑niebudź uźniać kielich pad tost «Žyvie Biełaruś».
Ciarhiej Dubaviec, žurnalist:
Dumaju, pavinna być pierajemnaść. Heta śviata čystaj idei, jakaja sama pa sabie nie stareje, nie zamutniajecca i nie vidaźmianiajecca. Zvyčajna čystuju ideju defarmujuć ludzi, jakija ad pryrody svajoj nieidealnyja. Kali jany datykajucca da idei, kab «na svoj rozum» vyrabić ź jaje niešta, časta atrymlivajecca prafanacyja. Kali ž jany datykajucca da idealnaha, kab samim nablizicca da čyścini, ideja moža sasłužyć im dobruju słužbu. A samy prosty sposab tut — kab prysutničała pierajemnaść.
Mnie pašancavała sioleta być zaprošanym da čałavieka, jaki 25 Sakavika adznačaŭ jašče ŭ HUŁAHu, tajemna, razam z Łarysaj Hienijuš. Pa vialikim rachunku, jany tam i apynulisia za svaju viernaść ideału. My budziem šmat razmaŭlać, zhadvać ludziej pavajennaha supracivu, śpiavać pad fartepijana, pierahladać fotki. I nieprykmietna nas usich ahornie atmaśfiera čystaj idei, idealnaha śviata.
Pavieł Sieviaryniec, lider Chryścijanskaj demakratyi:
25 Sakavika ja budu na płoščy pierad Akademijaj navuk. Vaźmu ŭdzieł va ŭračystym šeści. Dzień Voli — heta Dzień Niezaležnaści našaj krainy. Pakul Biełaruś niesvabodnaja, treba adznačać hetaje śviata na vulicach.
Radzim Harecki, akademik‑hieołah:
Ja zaŭsiody budu adznačać Dzień Voli ŭ svajoj dušy i sercy — heta hałoŭnaje.
Sioleta my płanujem pryvatna adznačać Dzień Voli, vuzkim kołam siabroŭ. Siarod ich budzie i ŭnučka Jakuba Kołasa — Maryja Mickievič. Raniej zaŭsiody chadzili na šeści. Ale z uzrostam zvyčki źmianiajucca. Ciapier užo nie toj uzrost, kab chadzić niekudy. Hałoŭnaje, kab śviata ŭ sercy było.
Ivan Šyła, lider salihorskaj moładzi:
Ja budu ŭ Minsku 25‑ha, vaźmu ŭdzieł u vuličnym šeści. A potym ź siabrami pryvatna budziem adznačać.Uvohule liču, što ŭ budučym hetaje śviata pavinna adznačacca spakojna, biez aficyjozu, na asabistym uzroŭni. Jak, naprykład, u Čechii, dzie nacyjanalnyja śviaty adznačajucca vyviešvańniem ściahoŭ i siabroŭskimi sustrečami.
***
Dzień Voli dazvolili
Minharvykankam dazvoliŭ apazicyjnym arhanizacyjam pravieści 25 Sakavika ŭ Minsku akcyju z nahody Dnia Voli.
U zajaŭcy prasili dazvolić zbor a 18‑j hadzinie na placoŭcy la Akademii navuk, a potym chodnikami pa praśpiekcie prajści da skviera Janki Kupały, dzie pavinien byŭ adbycca mitynh z udziełam kandydataŭ u deputaty ŭ miascovyja saviety.
Haradskija ŭłady, pa tradycyi, adpravili apazicyju na Banhałor. Tym nie mienš, miesca zboru dazvolili zapłanavanaje.
Lider BNF Alaksiej Janukievič padkreślivaje, što ŭ śviatkavańni Dnia Voli voźmuć udzieł usie demakratyčnyja siły. Pa słovach Janukieviča, akcyja 25 Sakavika pavinna stać pryhožaj i ŭračystaj. «Heta vydatnaje biełaruskaje śviata, jakoje treba adznačać», — kaža Janukievič.
Na pytańnie, jak źbirajucca dziejničać arhanizatary, kali AMAP pieraharodzić darohu ŭ centr, Janukievič adkazaŭ: «Heta budzie zaležyć ad toj kolkaści ludziej, jakaja pryjdzie. Skažu dakładna adno, što na Banhałor ludziej nichto nie paviadzie».
Kamientary