Śledčy kamitet nakryŭ firmu, jakaja dapamahała adbyć raźmierkavańnie. Byłyja studenty prachodziać pa kryminalnaj spravie

Schiema

Centram historyi vystupaje «kansałtynhavaja firma» vypusknika BDEU Alaksieja Hureviča.

«Paśpiachovy pradprymalnik, jaki prymnažaje hrošy inšych i zachoŭvaje niervy i čas tym, u kaho jość adpracoŭka», — tak jon apisvaje siabie ŭ sacsietkach.

Ciapier infarmacyju pra dziejnaść firmy, jakaja zajmałasia «pošukam» pracaŭładkavańnia dla studentaŭ i «darmajedaŭ», možna znajści tolki praz Instagram — u im bolš za 4 tysiačy padpisčykaŭ. Pasty ŭ im pačali źjaŭlacca ŭ červieni 2020 hoda. U apisańni možna znajści spasyłku na tielehram-bot i sajt, jakija nie pracujuć.

Paŭhoda tamu na dziaržaŭnym TB vyjšaŭ film pra dziejnaść firmy Hureviča. U im raskazali pra tysiaču studentaŭ, jakija skarystalisia jaje pasłuhami.

Alaksieja, miarkujučy pa filmie, zatrymali letaś. U siužecie pakazany pieratrus u kvatery pradprymalnika, dzie siłaviki vyjavili dakumienty i pracoŭnyja knižki studentaŭ.

«Vypuskniki byli fiktyŭna aformlenyja na 0,1 staŭki, ich zarabotnaja płata składała nie bolš za 60 BYN u miesiac, ź jakich vypłačvalisia minimalnyja abaviazkovyja strachavyja ŭznosy i padachodnyja padatki — u ahulnaj sumie nie bolš za 30 BYN», — raskazvaje pradstaŭnik SK u filmie BT.

Vypusknik prynosiŭ nieabchodnyja dakumienty ŭ firmu Hureviča. Jon «afarmlaŭ» jaho ŭ adnu sa svaich «kampanij» i vydavaŭ zajaŭku dla ŭniviersiteta. Kali ŭniviersitet usio zadavalniała, administracyja zaćviardžała miesca adpracoŭki. Heta davała mahčymaść studentam chutka znajści miesca adpracoŭki i nie iści pa raźmierkavańni tudy, kudy prapanuje ŭniviersitet. Paralelna vypuskniki mahli praciahnuć šukać inšuju pracu, kab pieraraźmierkavacca ŭ budučyni.

Zakon

«U minułym hodzie ŭ nas było niekalki zvarotaŭ ad vypusknikoŭ, jakija karystalisia pasłuhami «arhanizacyi pa nadańni miesca pracy pa raźmierkavańni». Hetaja arhanizacyja za peŭnuju płatu davała vypuskniku «imiannuju» zajaŭku na raźmierkavańnie, a dalej fiktyŭna ŭładkoŭvała jaho da siabie na pracu na 0,1 staŭki. Realna hetyja vypuskniki ŭ arhanizacyi tolki ličylisia, ale nie pracavali. Pryčym dziejnaść firmy nasiła davoli masavy charaktar, adzin z klijentaŭ zhadvaŭ, što abjavy pra ich pasłuhi ledź nie byli raźviešanyja na došcy abjavaŭ univiersiteta», — raskazvajuć jurysty prajekta LegalHub.

16 maja 2023 hoda ŭ akaŭncie firmy Hureviča źjaviŭsia post pra toje, što jany pracujuć «zhodna z Pracoŭnym kodeksam, robiać vypłaty ŭ fond sacyjalnaj abarony, padatkovuju inśpiekcyju, «Biełdziaržstrach», a taksama aficyjna zapaŭniajuć pracoŭnuju knižku».

Pra heta ž u filmie kaža i namieśnica načalnika adździeła pa rasśledavańni złačynstvaŭ suprać ułasnaści SK pa Minsku Śviatłana Šelamiecieva:

«Student atrymlivaje list u VNU pra toje, što Alaksiej u asobie jakoha-niebudź sa svaich «pradpryjemstvaŭ» harantuje pracaŭładkavańnie pa toj śpiecyjalnaści, pa jakoj student atrymlivaje adukacyju, a taksama harantuje, što minimum 2 hady hety čałaviek budzie pracavać pa śpiecyjalnaści. Heta značyć adbudzie raźmierkavańnie tak, jak heta naležyć pavodle zakanadaŭstva.

Na samaj spravie nijakaj pracoŭnaj dziejnaści jon nie ažyćciaŭlaŭ, choć na pieršy pohlad usio vyhladaje zakonna. Nadajecca vyhlad aficyjnaj zakonnaj dziejnaści: na budučaha rabotnika afarmlajecca pracoŭnaja knižka, zaklučajecca pracoŭny dahavor, vypłačvajucca ŭznosy ŭ fond sacyjalnaj abarony. Pry praviercy ŭsio vyhladaje tak, što čałaviek sapraŭdy pracuje, choć na samaj spravie jon tolki zarobak atrymlivaje», — skazała Šelamiecieva.

Pa słovach adnaho z surazmoŭcaŭ «Miedyjazony», u VNU nie ŭźnikła pytańniaŭ da pasady i jaho budučaha miescy pracy. Nichto nie papiaredžvaŭ, što varyjanty adpracoŭki niezakonnyja.

U dakumiencie, jaki rehłamientuje raźmierkavańnie vypusknikoŭ, havorycca, što «raźmierkavańnie ažyćciaŭlajecca kamisijaj pa raźmierkavańni», jakaja «prymaje rašeńnie ab raźmierkavańni adkrytym hałasavańniem bolšaściu hałasoŭ prysutnych na jaje pasiadžeńni členaŭ».

Kryminalnaja sprava

«Usim, chto tam adpracoŭvaŭ, pryjšoŭ list z navučalnaj ustanovy ab apłacie za raźmierkavańnie. Heta značyć čas, jaki ty tam [aformlenym na firmie Hureviča] ličyŭsia, ličycca nieadpracavanym — adnoj dziaŭčynie naličyli bolš za 30 tysiač rubloŭ, jakija jana pavinna vypłacić. Jany [firma Hureviča] pišuć u pracoŭnaj i ŭ błanku dla raźmierkavańnia lubuju pasadu, jakuju zachočacie.

Heta było zakonna, realnaja arhanizacyja i hetak dalej. Prosta heta ličycca fiktyŭnym raźmierkavańniem — adpracoŭka idzie, a vy na jaje nie chodzicie. Ja nie chadziła na adpracoŭku, ja płaciła kožny miesiac pa 70-90 rubloŭ i nibyta ličyłasia. I tak rabili mnohija. U mianie prajšło ŭžo 3 hady paśla adpracoŭki, i niadaŭna pryjšoŭ list», — raskazvaje adna z vypusknic.

«Studenty, jakija ciapier pryciahnutyja, całkam kampiensavali škodu, jakuju pryčynili svaimi dziejańniami dziaržavie. Viarnuli hrašovyja srodki, jakija byli vydatkavanyja na ich navučańnie. Treba razumieć, što hetyja hrašovyja srodki ŭjaŭlajuć saboj davoli značnuju sumu, pakolki vydatki na navučańnie zaležać ad śpiecyjalnaści, jakuju atrymali studenty, i składajuć kala 50 tysiač. Lepš adrazu pryjści i va ŭsim pryznacca, choć my ŭsio adno dojdziem da kožnaha», — zhadvałasia ŭ filmie BT.

«Miedyjazona» pahavaryła ź jašče adnym vypusknikom, jaki ciapier znachodzicca za miažoj, suprać jakoha była zaviedzienaja kryminalnaja sprava pa artykule ab pryčynieńni majomasnaj škody biez prykmiet kradziažu, ździejśnienaha hrupaj asob pa papiaredniaj zmovie albo ŭ bujnym pamiery.

Adnaho z hierojaŭ siłaviki pastavili pierad vybaram: albo jon «usio zrobić pravilna», vypłaciŭšy peŭnuju sumu «kampiensacyi», i tady sprava «pieratvorycca» z kryminalnaj u administracyjnuju, albo «buduć drennyja nastupstvy, usio dojdzie da suda i kryminalnaj spravy». Na praktycy heta kampiensacyja ŭniviersitetu za navučańnie, štraf i «danat» u dabračynnuju arhanizacyju.

Žurnalisty dziaržTB u filmie raskazvajuć, što mnohija ludzi ŭžo pačali viartać daŭhi: «Havorka idzie pra prystojnuju sumu, jakaja moža viarnucca ŭ biudžet krainy». Miechanizm «zamieny kryminałki na administracyjku» isnuje, jon praduhledžany artykułam 86 KK: «Asoba, jakaja ŭčyniła złačynstva i kampiensavała škodu, moža być vyzvalenaja ad kryminalnaj adkaznaści z pryciahnieńniem da administracyjnaj adkaznaści».

«Hetyja normy sapraŭdy vykarystoŭvajucca ŭ praktycy biełaruskich siłavych orhanaŭ. Vy, napeŭna, čuli historyi, jak biznesmieny «adkuplalisia» ad kryminalnaj adkaznaści. Rabiłasia heta ŭ tym liku z vykarystańniem hetaha artykuła. Zychodziačy z našych znosin z klijentami, paŭstała ŭražańnie, što havorka idzie jakraz pra «kampiensacyju škody, naniesienuju złačynstvam», a pamier kampiensacyi im raźličvali zhodna z Pałažeńniem ab kampiensacyi srodkaŭ za padrychtoŭku maładoha śpiecyjalista, zaćvierdžanaha pastanovaj №572», — tłumačyć LegalHub.

Zabarona

U studzieni «Kibierpartyzany» apublikavali dakumienty, u jakich apisanyja płany ŭniasieńnia źmienaŭ u Kodeks ab adukacyi. Siarod prapanoŭ KDK jość punkt «Uviadzieńnie sistemy kantrolu za staŭleńniem najmalnikaŭ da maładych śpiecyjalistaŭ i adkaznaści za pakazčyki ciakučaści kadraŭ».

U 2019 hodzie na sajcie pravo.by źjaviŭsia artykuł (jon da hetaha času dastupny), u jakim jurystka i byłaja daradca Śviatłany Cichanoŭskaj pa pravavych pytańniach Kryścina Rychter adkazvała na pytańni ab raźmierkavańni vypusknikoŭ. Siarod pytańniaŭ byŭ i toj, jaki zakranaŭ raźmierkavańnie na niapoŭnuju staŭku, a taksama pracu pa sumiaščalnictvie:

«U čałavieka moža być dźvie ci navat try pracy. Naprykład, praca «A» — asnoŭnaje miesca pracy. Arhanizacyja «B» — praca pa sumiaščalnictvie. Ci možna pracavać pa raźmierkavańni pa sumiaščalnictvie? U zakanadaŭstvie niama zabarony. Ale Ministerstva adukacyi kaža, što praca pa sumiaščalnictvie nie idzie ŭ staž. A heta važna — staž pracy pa profili. Tamu jany bolš za toje, kab studenty pracavali pa asnoŭnym miescy pracy na raźmierkavańni. Ale zabaronaŭ niama, dachodzić da taho, što možna raźmierkavacca navat na 0,1 staŭki, heta značyć 40 chvilin pracy ŭ dzień», — tłumačyła Rychter u 2019 hodzie.

5 śniežnia 2024 hoda ŭ pastanovu Savieta Ministraŭ Respubliki Biełaruś ad 31 žniŭnia 2022 hoda № 572 unieśli źmieny, siarod jakich jość punkt, jaki zabaraniaje raźmiarkoŭvać vypusknikoŭ na dystancyjnuju pracu i vyznačać im niapoŭny pracoŭny čas.

Jurysty prajekta LegalHub paćvierdzili, što raźmierkavańnie na niapoŭnuju staŭku da ŭniasieńnia źmienaŭ nie było niezakonnym. Ale, pa ich infarmacyi, studentam stavili ŭ vinu nie adpracoŭku na niapoŭnuju staŭku, a padrobku dakumientaŭ i pryčynieńnie majomasnaj škody biez prykmiet kradziažu.

«Vierahodna, siłavyja orhany paličyli, što kali arhanizacyja, kudy vypusknikoŭ nibyta raźmiarkoŭvali, faktyčna nie ažyćciaŭlała dziejnaść, tady jaje kiraŭniki ŭ zmovie z vypusknikami adabrali ŭ dziaržavy kaštoŭnyja kadry, jakija mahli pracavać na karyść dziaržavy. U krajnim vypadku vypuskniki mahli b pakryć u biudžet hrošy za navučańnie, kab atrymać daviedku ab samastojnym pracaŭładkavańni, čym taksama dapamahli b dziaržavie. Da hetaha dadajecca fakt, što firma padrablała apaviaščeńni ab prybyćci vypusknikoŭ na pracu pa raźmierkavańni, jakija nakiroŭvalisia VNU», — tłumačać jurysty LegalHub.

Miarkujučy pa dacie vychadu filma na BT, sprava pra fiktyŭnyja adpracoŭki praciahvajecca minimum ź leta 2024 hoda. «Miedyjazonie» viadoma pra vypadki, kali byłych studentaŭ trymajuć pad padpiskaj ab niavyjeździe, praciahvajuć vyklikać na dopyty i pryciahvajuć blizkich u jakaści śviedak.

• 0
• 0
• 7
• 6
• 0
• 0
• 0
• 0