Kolkaść achviar abrušeńnia dachu načnoha kłuba ŭ Daminikanskaj Respublicy ŭzrasła da 184 čałaviek, paviedamlaje hazieta Diario Libre.
Pavodle słoŭ kiraŭnika vyratavalnaj słužby Chuana Manuela Miendesa, u ratavalnikaŭ zastałosia da 20 hadzin, kab znajści vyžyłych, piša Bi-bi-si.
Siarod zahinułych — viadomy 51-hadovy biejsbalist Aktarya Dotel. Jaho dastali z-pad zavałaŭ, ale jon pamior pa darozie ŭ balnicu.
Prezident krainy Łuis Abinader prybyŭ na miesca trahiedyi i vykazaŭ spačuvańni siemjam zahinułych.
Dach načnoha kłuba Jet Set u Santa-Daminha raptoŭna abrynuŭsia nočču z 8 na 9 krasavika padčas vystupleńnia viadomaha vykanaŭcy mierenhi Rubi Pieresa. Pavodle słoŭ jaho dački, sam muzyka taksama apynuŭsia pad zavałami — znajści jaho pakul nie ŭdałosia.
Miascovyja ŚMI paviedamlajuć, što ŭ kłubie na momant abrušeńnia mahło znachodzicca kala tysiačy čałaviek.
Pa słovach Chuana Manuela Miendesa, kolkaść achviar moža jašče ŭzraści — pad zavałami zastajecca šmat paciarpiełych, i jon vykazaŭ nadzieju, što mnohich udasca vyratavać. U pošukach udzielničaje kala 400 ratavalnikaŭ.
Jet Set — papularny načny kłub u stalicy Daminikanskaj Respubliki, dzie pa paniadziełkach ładziacca kancerty tancavalnaj muzyki.
Na vystup Rubi Pieresa pryjšli taksama viadomyja ŭ krainie palityki, spartoŭcy i inšyja znakamitaści.
Siarod zahinułych — hubiernatarka pravincyi Montie-Kryści Nelsi Krus, jana pamierła ŭ balnicy ad atrymanych traŭmaŭ.
Na videazapisach, zroblenych u kłubie niezadoŭha da abrušeńnia dachu, vidać, jak ludzi siadziać za stolikami pierad scenaj, niekatoryja tančać.
Na adnym ź videa, apublikavanym u sacsietkach, čuvać, jak niechta, pakazvajučy palcam na stol, kaža, što niešta ŭpała sa stoli. Na zapisie taksama bačna, što Rubi Pieres zirnuŭ u toj samy bok, kudy pakazvaŭ hladač.
Mienš čym praz 30 siekund razdajecca mocny hrukat, paśla čaho na videa zastajecca tolki čorny ekran. Čutny žanočy hołas: «Tata, što z taboj zdaryłasia?»
Jak raspavioŭ miascovym ŚMI adzin z muzykantaŭ, što vystupaŭ razam z Rubi Pieresam, dach abrynuŭsia kala pieršaj hadziny nočy 8 krasavika.
«Ja padumaŭ, što heta ziemlatrus», — skazaŭ jon.
Daminikanskaja Respublika źjaŭlajecca adnoj z samych papularnych u turystaŭ krain u Karybskim mory. Pavodle źviestak uładaŭ, letaś jaje naviedali kala 11 miljonaŭ turystaŭ.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie6
Kamientary