Śviedka Arciukievič: «Za ahavor Aŭtuchoviča abiacali załatyja hory»

Na pracesie nad Mikałajem Aŭtuchovičam, Uładzimieram Asipienkam, Michaiłam Kazłovym i Alaksandram Łarynym dapytali čałavieka, jaki padpalvaŭ dom milicyjanta Kacuby i śviedku, jaki znajšoŭ hranatamiot. Juryj Arciukievič pryznany sudom vinavatym u padpale domu byłoha načalnika vaŭkavyskaj milicyi Kacuby i padpalvańni haražu i aŭtamabila supracoŭnika padatkovaj inspekcyi Mandzika.

Juryj Arciukievič adbyvaje pakarańnie ŭ kalonii. Na praces ŭ Viarchoŭny sud śviedku pryvieźli ŭ kajdankach, jak i Alaksandra Kozieła, jakoha dapytvali ŭčora, 25 sakavika. Siońnia Jury Arciukievič paŭtaryŭ toje ž, što kazaŭ na svaim sudzie: što jon razam z Koziełam padpaliŭ dom milicyjanta Kacuby, ni ad kaho zamovy na hetaje złačynstva jon nie atrymlivaŭ, hrošaj jamu nie davali.

Pavodle Arciukieviča, hetak jon pomściŭ načalniku milicyi za svaje asabistyja prablemy: milicyjanty da jaho niezasłužana čaplalisia, nie davali pačać narmalnaje žyćcio paśla pieršaj sudzimaści, schilali da supracoŭnictva. Što da padpału haražu i aŭtamabila Mandzika, pavodle Arciukieviča, heta adbyłosia nieznarok: jon zalez u haraž, kab skraści kalosy, ale praliŭ paliva i vypadkova ŭźnik pažar.

«Padčas śledztva na mianie akazvali psychalahičny cisk, kab skazaŭ, što heta Aŭtuchovič zamoviŭ padpały, ale jon tut nie pry čym.

Mianie i potym, užo padčas adbyćcia pakarańnia dapytvali pa hetaj spravie i znoŭ schilali ahavaryć Aŭtuchoviča. Abiacali «załatyja hory»: pieravod ŭ lubuju kaloniju, navat daterminovaje vyzvaleńnie», — paviedamiŭ sudu Juryj Arciukievič.

Raniej na pracesie hučała, što Aŭtuchovič davaŭ Arciukieviču videakameru, kab toj zdymaŭ dom milicyjanta Kacuby. Hetyja źviestki śviedka paćvierdziŭ. «Heta było patrebna, kab źniać na videa aryštantaŭ, jakich pryvozili pracavać na domie načalnika milicyi», — patłumačyŭ śviedka Juryj Arciukievič.

Pra znajomstva ź Mikałajem Aŭtuchovičam śviedka raspavioŭ, što paznajomiŭsia ź im praz svajakoŭ. Aŭtuchovič nibyta dobra da jaho staviŭsia, dapamahaŭ jamu jak maładomu čałavieku, jaki rana zastaŭsia biez maci i apynuŭsia ŭ składanaj sytuacyi paśla pieršaj sudzimaści.

Na pracesie taksama daŭ pakazańni nastaŭnik bijalohii haradzienskaha liceju №1 spadar Picho, jaki 28 kastryčnika 2005 hoda znajšoŭ na terytoryi liceja hranatamiot.

Śviedka pakazaŭ, što pracavaŭ na klumbach kala płotu, kali znajšoŭ hranatamiot. Zbroja lažała pad samarobnaj maskirovačnaj sietkaj. U hetym miescy raśli kusty, jakija śviedka źbiraŭsia padrezać.

«U hetaj častcy pakazańni śviedki supadajuć z tym, što kazaŭ Alaksandr Łaryn. Što byccam vakoł było bolš kustoŭ, čym na fotazdymku pry ahladzie miesca, jaki zrabili praź niekalki dzion. Maŭlaŭ, ich potym padrezali. I voś śviedka kaža, što sapraŭdy pracavaŭ na klumbie. Ale mnie padajecca, što Łaryn prosta adniekul viedaŭ, što budzie kazać śviedka. Vielmi nastojliva jon padkreślivaŭ hetuju detal pra kusty», — miarkuje pravaabaronca Aleh Voŭčak, jaki tryvała sočyć za pracesam.

• 0
• 0
• 0
• 0
• 0
• 0
• 0
• 0