Nia vyklučana, što na źjeździe «Za niezaležnaść» budzie stvorany adnajmienny blok
Pieramovy ab stvareńni takoha bloku ŭžo pačalisia j buduć vieścisia z roznymi siłami: ad KCHP-BNF da sacyjał-demakrataŭ
Tema niezaležnaści Biełarusi znoŭ trapiła ŭ epicentar hramadzkaj uvahi. Spačatku Alaksandar Milinkievič vystupiŭ z zvarotam da biełaruskaha narodu, u jakim papiaredziŭ pra niebiaśpieku praviadzieńnia referendumu pra «kanstytucyjny akt sajuznaj dziaržavy». Milinkievič piša, što faktyčna stavicca pytańnie, ci budzie isnavać Biełaruś.
Jon maluje niaradasnuju perspektyvu, jakaja čakaje biełarusaŭ u vypadku dalejšaj intehracyi z Rasiejaj: «Abjadnajemsia – i našy dzieci buduć vajavać u Čačni, i skupiać našyja pradpryjemstvy i ziamlu ichnija aliharchi, i pryjduć da nas ichnija mafija i złačyncy, i staniem my hłybinkaj Rasiei, dzie žyvuć kudy biadniej, čym siońnia ŭ nas». Milinkievič nie nazyvaje krynicaŭ, ź jakich jon maje źviestki pra pahrozu biełaruskaj niezaležnaści.
5 vieraśnia Partyja BNF prapanavała pravieści forum «Za niezaležnaść», staršyniom arhkamitetu jakoha mierkavana budzie mienavita Alaksandar Milinkievič. Staršynia PBNF Vincuk Viačorka adznačyŭ, što praviadzieńnie forumu mahčymaje ŭžo pry kancy kastryčnika, a jaho asnoŭnymi metami budzie kansalidacyja ŭsich niezaležnickich siłaŭ. Viačorka havoryć, što pytańnie ab mahčymym referendumie nikoli nie zdymałasia z paradku dnia ŭ abjadnanaj apazycyi. Razam z tym jon nia zmoh uciamna patłumačyć, čamu praviadzieńnie forumu zaplanavanaje mienavita zaraz.
U aŭtorak infarmacyjnaje ahienctva BiełaPAN paviedamiła, što padčas pracy forumu «Za niezaležnaść» moža być utvorany i adnaimienny blok na čale z tym ža Alaksandram Milinkievičam. U takim razie heta budzie svajho rodu kampensacyja za tak i nia stvorany Ruch «Za Svabodu».
Nie sakret, što jon nie paŭstaŭ praz sabataž partyjnych lideraŭ, što bajalisia asłableńnia svaich pazycyj. U kołach blizkich da Milinkieviča spadziajucca, što bolš volnaja forma bloku znojdzie zhodu Viačorki, Statkieviča, Palevikovaj dy inšych partyjcaŭ.
Namieśnik staršyni PBNF Alaksiej Janukievič paćvierdziŭ, što pieramovy ab stvareńni takoha bloku ŭžo pačalisia j buduć vieścisia z roznymi siłami: ad KCHP-BNF da sacyjał-demakrataŭ.
Pakul ciažka dać adnaznačny adkaz, nakolki pradstaŭničym budzie forum «Za niezaležnaść». Adzin ź lideraŭ AHP Alaksandar Dabravolski ŭranku ŭ sieradu jašče ŭvohule ničoha nia čuŭ pra hetuju ideju.
Kamientary