«Nie na tym baku čałaviečnaści». Nietańjachu abvinavaciŭ lidaraŭ Brytanii, Francyi i Kanady ŭ zaachvočvańni CHAMAS
Premjer-ministr Izraila Bińjamin Nietańjachu abrynuŭsia z napadkami na lidaraŭ Vialikabrytanii, Francyi i Kanady, zajaviŭšy, što jany «faktyčna padtrymali masavych zabojcaŭ, hvałtaŭnikoŭ, dzietazabojcaŭ i vykradalnikaŭ» u asobie CHAMAS, prystrašyŭšy niadaŭna Izrail sankcyjami za jaho dziejańni ŭ Hazie.
U Łondanie i Paryžy adkazali, što dastaŭka humanitarnaj dapamohi ŭ siektar pavinna być «masavaj i bieśpieraškodnaj», piša Bi-bi-si.
20 maja lidary hetych troch krain Kir Starmier, Emanuel Makron i Mark Karni asudzili pašyreńnie izrailskaj vajskovaj apieracyi ŭ Hazie, nazvaŭšy jaje «niesuraźmiernaj» i acharaktaryzavaŭšy humanitarnuju situacyju ŭ siektary jak «nievynosnuju».
«My nie budziem stajać u baku, pakul urad Nietańjachu praciahvaje hetyja aburalnyja dziejańni. Kali Izrail nie spynić vajenny nastup i nie zdymie abmiežavańni na pastaŭki humanitarnaj dapamohi, my raspačniem u adkaz kankretnyja dziejańni», — havaryłasia ŭ ich zajavie.
Paśla hetaha ŭ sieradu Starmier taksama zajaviŭ, što pastanova Izraila dapuścić u Hazie tolki abmiežavanuju kolkaść humanitarnaj dapamohi źjaŭlajecca «całkam niedastatkovaj». Sa słoŭ Nietańjachu, svajoj zajavaj Łondan, Paryž i Atava faktyčna dali zrazumieć, što jany chočuć, kab CHAMAS zastavaŭsia va ŭładzie ŭ siektary Haza. Padstavaj dla piatničnych rezkich vykazvańniaŭ Nietańjachu stała zabojstva dvaich supracoŭnikaŭ izrailskaj ambasady ŭ Vašynhtonie, zastrelenych na vychadzie z Habrejskaha muzieja.
Kamientujučy hety napad, Nietańjachu skazaŭ, što, na dumku lidaraŭ niekatorych krain-sajuźnikaŭ Izraila, jon pavinien «adstupić i pryznać fakt dalejšaha isnavańnia armii zabojcaŭ CHAMAS». Daŭninh-stryt pakul nie adreahavała niepasredna na zajavu Nietańjachu, ale nahadała, što brytanski premjer asudziŭ napad u Vašynhtonie.
Raniej u paście na płatformie ch Kir Starmier nazvaŭ zabojstva supracoŭnikaŭ izrailskaha pasolstva aktam antysiemityzmu, prajava jakoha nieabchodna vykaraniać, dzie b jon ni vyjaŭlaŭsia.
Francyja i Kanada taksama asudzili napad u Vašynhtonie. Ale, pa słovach Bińjamina Nietańjachu, imknieńnie hetych krain zmahacca z antysiemityzmam i ich zakliki da Izraila spynicca ŭ Hazie vidavočna supiarečać adzin adnamu.
«Ja kažu prezidentu Makronu, Premjer-ministru Kerni i premjer-ministru Starmieru, što kali masavyja zabojcy, hvałtaŭniki, zabojcy dziaciej i vykradalniki kažuć vam dziakuj, heta značyć, što vy znachodziciesia nie na tym baku pravasudździa, nie na tym baku čałaviečnaści, nie na tym baku historyi», — dadaŭ jon.
Izrailski ministr pa spravach dyjaspary Amichaj Šykli taksama zajaviŭ, što Starmier i inšyja lidary «padbadziorvajuć siły teroru».
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary