Azaraŭ: Kachanak Mielnikavaj braŭ udzieł u pravakacyi z Azaronkam i byŭ uznaharodžany
Kiraŭnik arhanizacyi Bypol Alaksandr Azaraŭ raskazaŭ telekanału «Biełsat» dadatkovuju infarmacyju pra supracoŭnika łukašenkaŭskich śpiecsłužbaŭ Alaksieja Łabiejeva, jaki, jak raniej paviedamlałasia, byŭ kachankam źnikłaj śpikierki Kaardynacyjnaj rady Anžaliki Mielnikavaj. Bypol — adna z arhanizacyj, jakaja biare ŭdzieł u rasśledavańni vydańniami Polityka i The Insider źniknieńnia Mielnikavaj.
Alaksandr Azaraŭ adznačyŭ, što Alaksiej Łabiejeŭ — supracoŭnik upraŭleńnia vajskovaj kontrvyviedki KDB jak minimum pa stanie na 2021 hod. Jon skončyŭ vajskovy fakultet Biełaruskaha dziaržaŭnaha ŭniviersiteta, vypuskniki jakoha raźmiarkoŭvajucca ŭ asnoŭnym u HRU, KDB abo Ministerstva abarony pierakładčykami i vajskovymi karespandentami. Byŭ pieraviedzieny spačatku słužyć u Hrodna, dzie jość vajskovaja čaść 22410 HRU, a paśla — u Minsk.
U 2021 hodzie Łabiejevu vydali pašpart prykryćcia. Adbyłosia heta za miesiac da ździajśnieńnia pravakacyi, źviazanaj ź nibyta zamacham na prapahandysta Hryhoryja Azaronka.
«Pavodle našaj infarmacyi, hramadzianin Łabiejeŭ braŭ udzieł u hetaj pravakacyi. Jon atrymaŭ pašpart prykryćcia za miesiac da ŭdziełu ŭ joj. Z hetym pašpartam, jak miarkujecca, braŭ udzieł u hetaj pravakacyi i byŭ adnym sa śviedak u kryminalnaj spravie. A Anžalika, my tak razumiejem, — jahonaja nastupnaja raspracoŭka», — skazaŭ Azaraŭ.
Pravakacyja z zamacham na Azaronka adbyłasia letam 2021 hoda. 2 lipienia Alaksandr Łukašenka raskazaŭ, što pratestoŭcy nibyta chacieli «źnieruchomić, zachapić, kinuć u bahažnik» prapahandysta Azaronka, «vyvieźci ŭ les u samaje hłuchoje miesca, adrezać jazyk». Zatym byli apublikavanyja kadry napadu, źniatyja ź niekalkich rakursaŭ, u tym liku z mašyny napadnika — taksista ź Lidy Dźmitryja Sasnoŭskaha. Jaho zatrymali jašče da taho, jak jon dajšoŭ da Azaronka.
Jak vyjaviłasia paźniej, supracoŭniki śpiecsłužbaŭ pryvieźli jaho da prapahandysta svajoj mašynaj i vydali elektrašokier. Zabivać Azaronka abo adrazać jazyk nichto taksama nie źbiraŭsia — ź im chacieli zapisać «pakajannaje» videa. Za heta Sasnoŭski atrymaŭ 20 hadoŭ źniavoleńnia.
Alaksandr Azaraŭ adznačyŭ, što ŭ 2020 hodzie ŭsim śpiecsłužbam u Biełarusi byli pastaŭlenyja zadačy pracavać z pratestoŭcami i stvaryć hučnyja spravy, kab skampramietavać ich. U tym liku hetym zajmałasia vajskovaja vyviedka i vajskovaja kontrvyviedka KDB Biełarusi. Paśla taho, jak spravakavanych i skampramietavanych pratestoŭcaŭ zatrymlivali, arhanizatary z kryminalnaj spravy źnikali abo vystupali ŭ jakaści śviedak, u tym liku pad źmienienymi źviestkami.
Za akcyju z Azaronkam Łabiejeŭ atrymaŭ dziaržaŭnuju ŭznaharodu, skazaŭ Azaraŭ.
Žonka ahienta-kachanka Anžaliki Mielnikavaj źviazanaja z arhanizacyjaj Ruskaja madel efiektyŭnaha spakušeńnia
Kachanak Anžaliki Mielnikavaj — ahient biełaruskich śpiecsłužbaŭ z pašpartam prykryćcia
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi
Mielnikava krała hramadskija hrošy pa $2500, pieravodziačy na ŭłasny rachunak
Martynava: Mielnikavu pačynajuć mazać tvaram ab asfalt. Maja viersija, što jaje ŭžo niama ŭ žyvych
Praz try miesiacy paśla źniknieńnia Mielnikavaj KR vystupiła z doŭhačakanaj zajavaj
Ciapier čytajuć
«Ludzi iduć u miačeci, a nie lečać psichičnyja chvaroby». Biełaruski psichijatr raskazaŭ ab pracy va Uźbiekistanie i ŭ Polščy2
Kamientary
Jak ja raniej pisaŭ, siadzić jana dzieści ŭ sklapieńniach kdb, a jany dumajuć što z hetym rabić. A byłymuž jaŭna byŭ "u spravie".