Mazyrskaja rajonnaja hazieta «Žyćcio Paleśsia» admoviłasia publikavać prahramu kandydata ŭ deputaty rajsavieta, adnaho ź lideraŭ maładziožnaj arhanizacyi Partyi BNF «Moładź BNF» vajennasłužačaha Franaka Viačorki.
Jak paviedamiŭ Viačorka, u adkazie za podpisam hałoŭnaha redaktara haziety Łarysy Čornaj skazana, što jaho prahrama parušaje artykuł 75 Vybarčaha kodeksa. U hetym artykule, u pryvatnaści, havorycca, što prahrama kandydata nie pavinna ŭtrymlivać «prapahandy vajny, zaklikaŭ da hvałtoŭnaha źmianieńnia kanstytucyjnaha ładu, parušeńnia terytaryjalnaj cełasnaści Respubliki Biełaruś, da sacyjalnaj, nacyjanalnaj, relihijnaj i rasavaj varožaści, abrazaŭ i paklopu ŭ dačynieńni da słužbovych asob Respubliki Biełaruś».
Pavodle słoŭ Viačorki,
redaktar uhledzieła paklop u frazie «čynoŭniki prajadajuć našy z vami hrošy».
Kandydat nakiravaŭ zajavu ŭ CVK z prośbaj dać pravavuju acenku jaho pieradvybarnaj prahramie i adnačasova prapanavaŭ haziecie krychu źmienienuju frazu: «Čynoŭniki nie haładajuć za našy z vami hrošy».
U prahramie Viačorki, pavodle jaho słoŭ, try hałoŭnyja punkty: viartańnie Mazyru statusu zabrudžanaha radyjacyjaj horada; ramont daroh; ułada pavinna słužyć ludziam.
Praktyčna štodzionna (piać razoŭ za apošnija siem dzion) kiraŭnictva čaści ŭ supravadžeńni zampalita adpuskaje vajennasłužačaha na niekalki hadzin u horad.
6 krasavika kandydat pavinien zabrać z drukarni ahitacyjnyja materyjały. Na 15 krasavika pryznačana sustreča z vybarščykami Viačorki i jaho davieranaj asoby člena‑karespandenta Nacyjanalnaj akademii navuk Ivana Nikitčanki. Pavodle słoŭ kandydata, žychary Mazyra adčuvajuć siabie pakryŭdžanymi ŭładaj i vitajuć jaho imknieńnie štości źmianić.
Miascovyja vybary projduć 25 krasavika.
