«Usie pamruć, a ja zastanusia» Valeryi Haj Hiermaniki
Zadušlivaja historyja pra pjanych školnicaŭ.
Usie pamruć, a ja zastanusia (Vsie umrut, a ja ostanuś)
Rasieja, 2008, kalarovy, 80 chv.
Režysiorka: Valeryja Haj Hiermanika
Roli vykonvajuć: Palina Fiłonienka, Ahnija Kuźniacova, Volha Šuvałava, Danatas Hrudovič, Julija Alaksandrava
Žanr: Sacyjalnaja čarnuška
Adznaka: 5 (z 10)
Try siabroŭki čakajuć školnuju dyskateku. Ale paśla taho, jak adna ź dziaŭčynak svarycca z nastaŭnicaj i nie načuje doma, dyskateka pad pahrozaju zryvu. Hieraini chucieńka mianiajuć «viečnaje siabroŭstva» na tanculki. Abražanaja chulihanka taksama nie źbirajecca spyniacca na dasiahnutym.
Stužka Haj Hiermaniki — razdražniony sacyjalny žest, zrobleny kinakamieraj. Aktrysy-pierarostki natchniona hrajuć školnicaŭ. (U roli cybataj ściervy – Ahnija Kuźniacova, cichmianaja achviara mańjaka z «Hruza 200».) Dryhotkaja ručnaja kamiera ŭščylnuju nabližanaja da piersanažaŭ; doŭhija kadry. Mova dzietak adpaviednaja — dakumientalna-ptušynaja, «adnakletačnaja», pad šeruju škołu ŭ spalnym rajonie.
Karcina, pryviečanaja ŭ Kanach, — zadušlivy kalučy tupičok, padpolle, dzie niama navat uskrajka nieba. Biez hłybini; usio — pavierchnia, fizičnaja — fizijałahičnaja.Adkormlenyja potnyja mordy nastaŭnicaŭ. U ziuziu pjanaja školnica na kłazietnaj padłozie. Šurpaty jazyk abkuranaha padletka. Cyharetnyja plaŭki pad spartovaj zalaj, dzie hierainia hublaje cnotu. I heta možna b paličyć krykam bolu, kali b tolki nie kryk arhazmu (praktyka Hiermaniki na pornafilmach dajecca ŭ znaki. Ciapier režysiorka na rasiejskim telekanale vypuskaje sieryjał «Škoła»).
Narešcie, sacyjalny žest, dziela jakoha ŭsio i rabiłasia:
«Mama i tata, idzicie na ch…! Idzicie ŭ p…!»
Novaje rasiejskaje kino pra źniavažanych i pakryŭdžanych pniecca ŭ siabry padletkam, jakija vučacca nienavidzieć baćkoŭ. A dla baćkoŭ film — arhumient, kab dziaciej nie zavodzić.
Ciapier čytajuć
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii3434
Kamientary