Paśpiešlivaje rašeńnie, mienavita pad takim zahałoŭkam «Gazeta Wyborcza» źmiaściła na svajoj internet-staroncy materyjał, pryśviečany rašeńniu źmiaścić cieły Lecha i Maryi Kačynskich u sabory Vavielskaha zamka – histaryčnaha centra Polščy.Takoje rašeńnie pryniała siamja trahična zahinułaj pary – brat Lecha Kačynskaha Jarasłaŭ i dačka Marta.
Kali heta adbudziecca, a padobna, što rašeńnie ŭžo pryniataje kančatkova, Lech Kačynski stanie pieršym prezidentam, pachavanym na Vavieli. Tam znajšli spačyn takija važnyja dla historyi Polščy asoby, jak Uładzisłaŭ Jahajła, Kazimir Vialiki, Ściapan Batura, Tadeuš Kaściuška, Adam Mickievič i inš.
Na forumach polskich internet-vydańniaŭ navina ab mahčymym pachavańni Kačynskich na Vavieli vyklikała aktyŭnaje abierkavańnie.
«Kraina była abjadnanaj tolki try z pałovaj dni» – takaja asnoŭnaja dumka kamientaroŭ.
Padobnym byŭ i źmiest lista Andžeja Vajdy, ź jakim jon źviarnuŭsia da palakaŭ.
Taja ž «Gazeta Wyborcza» adznačaje ŭ svaim artykule, što «Ich značeńnie (asobaŭ, što znajšli spačyn na Vavieli) dla našaj historyi i kultury padćvierdziła šmat pakaleńniaŭ palakaŭ. Rašeńnie, pavodle jakoha Lech Kačynski paśla śmierci budzie susiedničać ź Piłsudskim, tvorcam niezaležnaści Polščy, nieadpaviednaje».
Inšaje papularnaje polskaje vydańnie – «Rzeczpospolita» – u paviedamleńniach ab płanach pachavańnia Lecha Kačynskaha nie źmiaščaje krytyčnych kamientaroŭ.
Sacyjalnyja sietki i błohi zapoŭnilisia dopisami, u jakich aŭtary vystupajuć suprać pachavańnia Kačynskich u Krakavie. Polskija internaŭty nazyvajuć jaho pierabolšvańniem i kamientujuć jak nieprymalnaje.
Nakolki abhruntavanaje takoje rašeńnie? Biezumoŭna, niahledziačy na trahičnuju śmierć, Lecha Kačynskaha nielha pastavić u adzin šerah z tymi, chto ŭžo pachavany na Vavieli. Rašeńnie zrabić taki krok chutčej emacyjnaje. Adnak padobna na toje, što mała chto zaraz u Polščy moža zapiarečyć bratu zahinułaha prezidenta, Jarasłavu.
