Rasija pačynaje ŭśviedamlać pamyłkovaść sprobaŭ nacisku na Biełaruś.
Takoje mierkavańnie vykazaŭ u sieradu, 14 krasavika, kiraŭnik Biełarusi Alaksandr Łukašenka, adkazvajučy na pytańni žurnalistaŭ padčas naviedvańnia Mazyrskaha rajona Homielskaj vobłaści.
«Miarkuju, Rasija razumieje, što była dapuščana žorstkaja pamyłka — raspačatyja sproby nacisku na Biełaruś. Heta bieśpierśpiektyŭna,— padkreśliŭ biełaruski lider. — I ŭpeŭnieny, prezident Rasii siońnia heta vielmi vyrazna pačynaje ŭśviedamlać».
Pavodle słovaŭ Alaksandra Łukašenki, jaho najbližejšaja sustreča ź Dźmitryjem Miadźviedzievym, chutčej za ŭsio, adbudziecca ciaham traŭnia.
«My ź Dźmitryjem Anatoljevičam niadaŭna niekalki razoŭ razmaŭlali pa telefonie, i jon prosta skazaŭ: čas nam sustrecca, pahutaryć, nakapilisia mnohija pytańni, časam štučnyja, jakija my ŭ stanie vyrašyć. Ja całkam padtrymaŭ jaho punkt hledžańnia. I zaraz kiraŭniki prezidenckich administracyj prapracoŭvajuć aptymalnyja terminy sustrečy. Jana, mahčyma, adbudziecca napiaredadni niefarmalnaha samitu SND u Maskvie 8 maja, moža być, u kancy maja abo pačatku červienia, jak my zvyčajna sustrakalisia ŭ Sočy», — skazaŭ kiraŭnik dziaržavy.
Padčas sustrečy sa svaim rasiejskim kaleham Łukašenka maje namier abmierkavać pierśpiektyvy ŭdziełu rasijskaha kapitału ŭ akcyjanavańni biełaruskich pradpryjemstvaŭ. Akramia taho, buduć razhladacca stratehičnyja pytańni raźvićcia Mytnaha sajuza Biełarusi, Kazachstana i Rasii. «Ja chaču dakładna razumieć, što mienavita Rasija i Kazachstan chočuć ad Mytnaha sajuza i što ŭ takim vypadku budzie ad jaho mieć naša kraina, — adznačyŭ biełaruski lider. —
Kali heta buduć sucelnyja vyklučeńni, pošliny pa nafcie, hazie i hetak dalej, to ŭ Biełarusi napałovu źnizicca cikavaść da takoha sajuzu».
Akramia hetaha Alaksandr Łukašenka maje namier abmierkavać ź Dźmitryjem Miadźviedzievym pytańni dostupu pradukcyi biełaruskich pradpryjemstvaŭ na rynak RF. «U pryncypie, užo zusim zrazumieła, što błakavańnie našych tavaraŭ na rasijskim rynku pryviało da vielmi niehatyŭnych vynikaŭ dla samich rasijanaŭ», — zaŭvažyŭ jon.
Jon znoŭ padkreśliŭ, što
palityka błakavańnia z boku Rasii całkam bieśpierśpiektyŭnaja:
Biełaruś dakazała, što jana ŭ stanie vychodzić na inšyja, alternatyŭnyja rynki. «Nam niama nijakaha sensu svarycca z Rasijaj. My ni da kaho nie zalacajemsia.
Ale kali nas pačynajuć šturchać i šturchać u śpinu — my šukajem ščaścia ŭ inšych kropkach płaniety»,
— adznačyŭ Łukašenka. Biełaruś u stanie syści ad enierhietyčnaj zaležnaści ad Rasiei pa nafcie i hazu. «Našy niadaŭnija damoŭlenaści ź Vieniesuełaj — tamu śviedčańnie», — dadaŭ Alaksandr Łukašenka.
«Hałoŭnaje, kab nadychodziačaja sustreča z prezidentam Rasii dała kankretnyja vyniki, — skazaŭ biełaruski lider. —
Što heta takoje, kali rasijski bok uvodzić pošlinu na ŭvoz naftapraduktaŭ u Biełaruś?
Druhoje pytańnie: čamu dla nas ŭviali pošlinu na naftu, a Kazachstanu — krainie, u jakoj jość liški nafty, — nie ŭviali?
Čamu da biełarusaŭ takoje staŭleńnie?
Miarkuju, prezident Rasii i sam razumieje, što heta ŭžo zanadta aburalny prykład».
«Nastaŭ čas vielmi surjozna pahavaryć pra pierśpiektyvy našych adnosinaŭ z Rasijaj?» — reziumavaŭ biełaruski lider.
* * *
Taksama Łukašenka siońnia zajaviŭ, što
Biełaruś hatova pajści na prodaž častki akcyjaŭ luboha pradpryjemstva, ale za dobruju canu i bieź cisku z boku.
«Ciapier kryzis i košty na ŭłasnaść upali. Tamu ja i nie źbirajusia ničoha pradavać. Navošta? Našy pradpryjemstvy efiektyŭna pracujuć, prynosiačy vializnyja hrošy dla krainy.
Ale kali niechta choča kupić — płacicie hrošy, i dobryja, zabiaspłatna ničoha pradavacca nie budzie,
kab potym nas u hetym nie papraknuŭ narod», — skazaŭ kiraŭnik dziaržavy.
«Chočacie — płacicie, a my padumajem, pa jakim košcie vam pradać», — dadaŭ jon.
***
Alaksandr Łukašenka raspavioŭ ab tym, što pa pradstaŭlenaj jamu infarmacyi akazałasia, što asobnyja prazachodnija apazicyjnyja žurnalisty, atrymlivajučy hranty z Zachadu, adnačasova pracavali na Maskvu.
«Mnie pradstavili takuju ich cytatu z zvarotaŭ da Rasii: «Nie viercie Łukašenku, patrabujcie ad jaho, kab jon vyjšaŭ z «Uschodniaha partniorstva». Tolki tady, kali jon daść na heta abiacańnie, praciahvajcie ź im narmalny dyjałoh», — pryvioŭ prykład kiraŭnik Biełarusi.
«Ujaŭlajecie, prazachodnija žurnalisty, jakija žyvuć na zachodnija hranty, rekamiendujuć Rasii nastojvać na vychadzie Biełarusi ź jeŭrapiejskaha intehracyjnaha prajektu!», — padkreśliŭ kiraŭnik dziaržavy.
***
Łukašenka: Niadaŭnija padziei ŭ Biškieku — antykanstytucyjny dziaržaŭny pieravarot
Pra heta zajaviŭ u sieradu Alaksandr Łukašenka, adkazvajučy na pytańni žurnalistaŭ padčas rabočaj pajezdki pa Homielskaj vobłaści.
«Ja miarkuju, što palityka, pa-pieršaje, amierykancaŭ, a pa‑druhoje, rasiejcaŭ u dačynieńni da hetych padziejaŭ vielmi drennaja i niedalnabačnaja, — skazaŭ kiraŭnik dziaržavy. — Jany pavinny byli zajavić pra nieprymalnaść padobnych dziejańniaŭ kyrhyzskaj apazicyi».
