U Bałharyi patanuŭ znakamity rasijski teatralny režysior Juryj Butusaŭ
U Bałharyi padčas adpačynku trahična zahinuŭ viadomy rasijski teatralny režysior Juryj Butusaŭ. Jamu było 63 hady.
Butusaŭ patanuŭ padčas kupańnia ŭ mory ŭ rajonie horada Sazopal, dzie režysior adpačyvaŭ razam ź siamjoj. Padrabiaznaści trahiedyi ahučyŭ teatralny krytyk Raman Dałžanski: «Pajšoŭ u mora. Chvala źbiła i adniesła. Adniesła ad usich. Ad nas. Ad siamji. U Sazopali. Cieła ŭ Burhasie…»
Butusaŭ byŭ adnym z najbolš viadomych režysioraŭ Rasii. Jaho tvorčaja karjera pačałasia ŭ 1996 hodzie sa studenckaj pastanoŭki «U čakańni Hado». U 2000-ch hadach jon pracavaŭ u maskoŭskim «Satyrykonie», dzie stvaryŭ pastanoŭki «Ryčard III», «Karol Lir», «Čajka».
Z 1996 hoda Butusaŭ supracoŭničaŭ z teatram imia Lensavieta ŭ Sankt-Pieciarburhu, u 2011 hodzie staŭ jaho hałoŭnym režysioram.
U 2018 hodzie jon pakinuŭ hety teatr i ŭznačaliŭ teatr imia Vachtanhava ŭ Maskvie. Taksama pracavaŭ u MCHT imia Čechava, Maskoŭskim teatry imia Puškina, a taksama ŭ teatrach Paŭdniovaj Karei i Jeŭropy.
U listapadzie 2022 hoda režysior zvolniŭsia z teatra imia Vachtanhava, zajaviŭšy, što znachodzicca ŭ Paryžy i nie moža praciahvać pracu.
Paśla hetaha jon pracavaŭ za miažoj i adkryta vystupaŭ suprać vajny va Ukrainie. U Vilni Butusaŭ pastaviŭ śpiektakl «Rozenkranc i Hildenstern miortvyja» pa pjesie Toma Stoparda, u Ryzie — «Hohal. Partret».
Kamientary