Viačasłaŭ Łuckin pastaviŭ novy rekord, złaviŭšy ŭ minułyja vychadnyja na Vilejskim vadaschoviščy soma vahoj u 44 kiłahramy, a daŭžynioj — 1 mietr 93 santymietry. Miarkujecca, što heta samaja bujnaja ryba, kali-niebudź vyłaŭlenaja ŭ hetych vodach, piša Kraj.by.
Rybačyć vilajčanin z dapamohaj sučasnaha abstalavańnia — sonara, jaki dazvalaje bačyć rybu ŭ režymie anłajn. Sm byŭ vyjaŭleny na hłybini 12 mietraŭ. Pavodle jaho słoŭ, palavańnie na hihanta viali naŭmysna na praciahu troch tydniaŭ. Pieršaja sproba skončyłasia niaŭdała — som parvaŭ snaści i ŭciok.
Ale hetym razam udača była na baku rybaka. Pieraadoleŭšy supraciŭ hihanta, jon z dapamohaj žonki Julii zmoh zaciahnuć jaho ŭ łodku. Baraćba z trafiejem doŭžyłasia kala 40 chvilin, śpininh złamaŭsia na try častki.
— Adrenalin biŭ klučom! Łapatku źviało, śpina balić, — uspaminaje Viačasłaŭ.
Vaha soma akazałasia nastolki vialikaj, što mahčymaści biaźmiena zaškalili. Daviałosia razrezać rybu i ŭzvažvać pa častkach. Adna tolki hałava «monstra» paciahnuła na 8 kiłahramaŭ. Pavodle acenak rybaka, uzrost soma składaje ad 13 da 15 hadoŭ. Viačasłaŭ raskazaŭ, što somy nie ahresiŭnyja, za vyklučeńniem pieryjadu nierastu, kali jany achoŭvajuć hniazdo.
— Padobna na biełaje miasa, vielmi smačnaje. Častka ŭłovu pajšła na stejki, — rybak adznačyŭ vydatnyja smakavyja jakaści ryby.
Viačasłaŭ zachaplajecca rybałkaj ź dziacinstva, heta zachapleńnie pryščapiŭ jamu dziadula. Apošnija dva hady mužčyna pryśviačaje lubimaj spravie amal uvieś volny čas. Ale heta rybałka, vidavočna, zastaniecca ŭ jaho pamiaci jak samaja jarkaja i emacyjnaja.
Ciapier čytajuć
U Sudanie paŭstancy źbili samalot ź biełaruskim vajskovym lotčykam. Voś što pra jaho viadoma8
Kamientary