Premjer Fica: Meta ŭrada Słavakii nie paražeńnie Rasii, a chutčejšy kaniec vajny va Ukrainie
«Heta słavianie, jakija zabivajuć adno adnaho. Vajna — heta nie rašeńnie».
Premjer-ministr Słavakii Robiert Fica zajaviŭ, što metaj słavackaha ŭrada nie źjaŭlajecca paraza Rasii.
Pra heta jon skazaŭ u televizijnaj dyskusijnaj prahramie na hramadskim viaščalniku STVR, pryvodzić jaho słovy «Jeŭrapiejskaja praŭda».
Słavacki premjer-ministr znoŭ raskrytykavaŭ padychod Jeŭrapiejskaha Sajuza da vajny RF suprać Ukrainy.
«Metaj źniešniaj palityki Słavackaj Respubliki, urada Słavackaj Respubliki, premjer-ministram jakoj ja źjaŭlajusia, nie źjaŭlajecca paraza Rasijskaj Fiederacyi. Naša meta — jak maha chutčej skončyć vajnu va Ukrainie. Heta słavianie, jakija zabivajuć adno adnaho. Vajna — heta nie rašeńnie», — skazaŭ Fica.
Słavacki premjer, jak i jaho vienhierski kaleha Viktar Orban, daŭno krytykuje sankcyi ES suprać Rasii za jaje praciahłuju ahresiju suprać Ukrainy i vajennuju dapamohu Kijevu. Paśla prychodu da ŭłady pazaletaś ciapierašni ŭrad Fica vyrašyŭ spynić pastaŭki zbroi i vajennaj techniki ź dziaržaŭnych reziervaŭ va Ukrainu, ale dazvoliŭ praciahvać kamiercyjnyja pastaŭki.
«Kali b ES traciŭ stolki ž enierhii na mir, kolki jon tracić na padtrymku vajny va Ukrainie, vajnu možna było b daŭno skončyć. Ja nikoli nie budu premjer-ministram vajennaha času», — skazaŭ premjer-ministr Słavakii.
Na pytańnie maderatara, ci nie supiarečyć padychod adnosna nieŭmiašańnia ŭ vajnu va Ukrainie spadčynie tych, chto zmahaŭsia za svabodu Słavakii padčas Druhoj suśvietnaj vajny, Fica acharaktaryzavaŭ vajnu va Ukrainie jak rehijanalny kanflikt.
Paśla sustrečy Trampa i Pucina na Alascy Fica zaklikaŭ Ukrainu być adkrytaj da dyskusii ab terytaryjalnych źmienach, ličačy, što biez hetaha dalejšyja kroki dla spynieńnia vajny niemahčymyja.
Fica i Vučyč byli adzinymi haściami Pucina ź Jeŭropy na ŭzroŭni lidaraŭ dziaržaŭ na ŭračystaściach u Maskvie 9 maja.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy25
Kamientary