Skandalny «Viačerni Mahiloŭ» zakryli

Hałoŭnaja redaktarka vydańnia «Viečiernij Mohilev» Nadzieja Leŭčanka paviedamiła, što heta hazieta bolš vychodzić nie budzie: 

«Siońnia naša vydańnie nie vyjšła — dyrektar Mahiloŭskaj abłasnoj drukarni admoviŭsia nadrukavać «Viačorku». Farmalnaja pryčyna — niaznačnaja zapazyčanaść pierad pradpryjemstvam».

Mikałaj Leŭčanka, vidać, niejki svajak redaktarki, adhuknuŭsia na hetuju navinu vieršam ułasnaha vyrabu, jaki pačynajecca z nastupnych słoŭ:

«Hovorim o svobodie słova,
I vklučajem zielenyj śviet,
No «Viečiernieho Mohileva»
K sožaleniju, s nami niet».

Pry hetym, pa ironii losu, kali ŭ vydańnia ŭsio było dobra, to pra svabodu słova jano nie nadta rupiłasia, prynamsi pry redaktarstvie Nadziei Leŭčanki.

Hazieta «Viečiernij Mohilov» — adkrytaje akcyjaniernaje tavarystva. Hazieta vydajecca z 1992 hoda. Jaje zasnavaŭ viadomy ŭ horadzie žurnalist i paśpiachovy miedyjamieniedžar Alaksandr Sančuk. Heta byŭ čas, kali paŭstała niezaležnaja Biełaruś, a ŭ Mahilovie harvykankam uznačalvaŭ prychilnik demakratyčnych pieraŭtvareńniaŭ Siarhiej Habrusieŭ. Miascovy miedyjny rynak byŭ nasyčany hazietami, pa jakija stajali čerhi.

«Viečiernij Mohilov» byŭ «kankurentnazdatnym simpatyčnym vydańniem», zhadvaje jaho kolišni, ale ŭžo były čytač. Jon kaža, što takoj hazieta zastavałasia prykładna da 2013 hoda, a zatym niešta adbyłosia i jaje niby padmianili.

U žurnalisckim asiarodździ kažuć, što heta stała vynikam supracoŭnictva redakcyi z rasijskimi arhanizacyjami, jakija stali razrastacca paśla pratestu 2010 hodu. U vyniku «Viečiernij Mohilov» pieratvaryŭsia ŭ čarnasociennuju hazietu z absalutnym ihnaravańniem normaŭ žurnalisckaj etyki.

Usiebiełaruskuju słavu haziecie prynieśli hamafobnyja i antysiemickija artykuły. Jany stali tradycyjnymi dla «Viečiernieho Mohilova» pry redaktarstvie Nadziei Leŭčanki, i ich hod ad hodu bolšała.

Praŭda, u niejki momant hazieta stała zanadta adyjoznaj navat dla łukašenkaŭskaha režymu. U kancy 2010‑ch hadoŭ dziaržaŭnyja orhany stali znachodzić u jaje materyjałach ekstremizm, vydańnie pačało prajhravać sudy. Nie viarnulisia załatyja časy navat paśla 2020 hoda. U krasaviku 2023 hoda źjaviłasia infarmacyja pra toje, što Nadzieja Leŭčanka pakidaje pasadu hałoŭnaj redaktarki i idzie na piensiju, choć zastajecca zasnavalnicaj vydańnia i praciahvaje pracavać u im. Abaviazki hałoŭnaha redaktara tady stała vykonvać Ała Ismahiłava. Ale, jak vyhladaje, pa niejkich pryčynach hetyja płany da kanca daviedzienyja nie byli i Leŭčanka ŭ peŭny momant viarnułasia na hałoŭnuju pasadu. 

• 7
• 0
• 20
• 3
• 0
• 1
• 0
• 0