Prakuratura choča, kab milicyja bolš žorstka karała chatnich tyranaŭ: patrabujuć aktyŭniej vykarystoŭvać achoŭnaje pradpisańnie
Hienieralnaja prakuratura ahučyła svaje pretenzii da praktyki baraćby z chatnim hvałtam. Jak vynikaje ź viedamasnych materyjałaŭ, milicyja časta abychodzicca z abjuzierami zanadta miakka. Prakuratura patrabuje bolš rašučych mier i daje kankretnyja ŭkazańni, jak vykarystoŭvać miechanizmy izalacyi abjuzieraŭ ad achviar.
U viedamasnym časopisie «Zakonnaść i pravaparadak» apublikavany artykuł «Da pytańnia ab papiaredžańni chatniaha hvałtu» pad aŭtarstvam staršaha pamočnika prakurora Minska Natalli Kałpakovaj z kankretnymi zaŭvahami ŭ adras milicyi.
Asnoŭny paprok — niedastatkovaje prymianieńnie strohich mier da asob, jakija ŭčyniajuć hvałt u siamji. U pryvatnaści, viedamstva ličyć, što milicyja zanadta časta abmiažoŭvajecca papiaredžańniami tam, dzie patrebny realny pieraśled i izalacyja.
Kali paciarpiełaja (ci paciarpieły) piša zajavu ab prymireńni z ahresaram, to spravy ab administratyŭnym pravaparušeńni prosta śpisvajuć.
Prakuratura ž patrabuje, kab siłaviki lepš raźbiralisia ŭ situacyi. U vypadku, kali paciarpiełyja znachodziacca ŭ zaležnym stanie ad ahresaraŭ ci raniej ich spravy ŭžo spynialisia praz prymireńnie, to treba paŭtorna vyśviatlać žadańnie paciarpiełych pryciahnuć debašyra da adkaznaści. I navat kali paćviardžajecca prymireńnie, usio adno treba pieradać takija materyjały ŭ prakuraturu.
Tamu što tady budzie praściej stavić ahresaraŭ na ŭlik, pravodzić ź imi prafiłaktyčnuju pracu, a kali nie spracuje, to adpraŭlać u ŁPP ci zavodzić kryminalnyja spravy.
Aŭtarka pryvodzić prykład: u 2024 hodzie mužčyna zabiŭ svaju byłuju žonku. Kali stali raźbiracca, akazałsia, što z 2019 hoda ŭ ich nieadnarazova adbyvalisia siamiejnyja skandały. Paciarpiełaja zajaŭlała, što były muž jaje źbivaŭ, a susiedzi paćviardžali fakty pahroz zabojstvam. Pry hetym ni pa adnym z paviedamleńniaŭ pra chatni hvałt nie byli pryniaty adpaviednyja miery. Pa troch materyjałach byli pryniaty rašeńni ab spynieńni administracyjnaha pracesu ŭ suviazi z prymireńniem bakoŭ, a ŭ pahrozie zabojstvam, pra jakuju paviedamlali susiedzi, supracoŭniki milicyi nie znajšli złačynstva.
Hałoŭny instrumient, jaki dazvalaje časova izalavać kryŭdziciela ad achviary, — achoŭnaje pradpisańnie. Heta zabarona abjuzieru nabližacca da paciarpiełaha i, pry nieabchodnaści, patrabavańnie pakinuć sumiesnaje žyllo. Zhodna z zakonam, heta možna zrabić u tym vypadku, kali supolnaje pražyvańnie stvaraje realnuju pahrozu žyćciu abo zdaroŭju achviary i dzieciam.
«Analiz prakurorskaj praktyki pakazvaje, što nieabchodnaść jaho prymianieńnia ŭźnikaje značna čaściej, čym jano na samoj spravie vynosicca», — piša Natalla Kałpakova.
Navat pry najaŭnaści ŭsich zakonnych padstaŭ milicyja niaredka ihnaruje hetuju mieru, pakidajučy achviaru ŭ niebiaśpiecy.
Va ŭsich rajonach Minska vyznačany miescy časovaha pražyvańnia dla tych, u adnosinach kaho vyniesiena achoŭnaje pradpisańnie — kab ahresar pakinuŭ u spakoi žonku ź dziećmi i daŭ im pradychnuć. Heta płatnyja pakoi ŭ internatach, abstalavanyja meblaj. Adnak za dva hady — 2023‑2024 — u hetyja miescy było tolki adno zasialeńnie, bo milicyja i sudy nie chočuć vykarystoŭvać hety miechanizm.
A prakuratura patrabuje ad milicyi, kab jana nie čakała krytyčnaj situacyi, a dziejničała na apiaredžańnie, kali jość choć niejkija prykmiety pahrozy.
Kankretnaja prapanova — zrabić tak, kab milicyja kantralavała pavodziny tych, chto dva i bolš razy na praciahu hoda ździejśniŭ chatni hvałt, ale paśla pamiryŭsia z achviaraj.
Kamientary
Eta skriepa - samaja važnaja v russkom mirie, na etoj skriepie russkij mir osnovan, postrojen i stoit, i stojať budiet !!!!