U Rasii za apošnija dva dni adbylisia dva pažary na pradpryjemstvach za Urałam
Dniom 8 kastryčnika ŭ pramysłovaj zonie Novasibirska ŭspychnuŭ mahutny pažar. Słup dymu byŭ bačny z roznych častak horada. Pavodle infarmacyi MNS pa Novasibirskaj vobłaści, ahoń uźnik u handlova-vytvorčym składzie pobač z Zavodam prypojaŭ, jaki vypuskaje elektroniku i mikračypy, što vykarystoŭvajucca ŭ vajskovaj technicy, piša The Moscow Times.
Na miesca apieratyŭna prybyli pažarnyja padraździaleńni — u tušeńni ŭdzielničali bolš za 70 čałaviek i 23 adzinki techniki. Pažar byŭ łakalizavany na płoščy kala 2 tysiač kvadratnych mietraŭ, adnak častkova abvalilisia kanstrukcyi budynka. Pavodle papiarednich źviestak, paciarpiełych niama. Pryčyny ŭzharańnia pakul nie nazyvajucca.
Jak paviedamlajuć ŚMI, pa hetym adrasie zarehistravany filijał kampanii «Chiermann Rusija» — pradstaŭnictva niamieckaj firmy Hörmann, jakaja vyrablaje sistemy kantrolu ŭjezdu i pramysłovuju aŭtamatyku.
Heta ŭžo druhi vypadak uzharańnia pramysłovaha abjekta za Urałam za dva dni. Napiaredadni, 7 kastryčnika, pažar adbyŭsia ŭ Jekaciarynburhu kala Uralskaha turbinnaha zavoda. Tady hareŭ budynak kampanii «ChimKryaMaš», jakaja vyrablaje mietaličnyja kanstrukcyi dla budaŭnictva.
Płošča pažaru skłała kala 1000 kvadratnych mietraŭ, paciarpiełych taksama nie było. Na tušeńnie pryciahnuli 26 adzinak techniki i 76 ratavalnikaŭ. U samoj ža turbinnaj vytvorčaści ŭzharańniaŭ nie zafiksavali, i praca zavoda praciahvajecca ŭ zvyčajnym režymie.
Siłaviki raskazali, jak hrodzienskija błohiery tracili miljon, sabrany nibyta na lačeńnie dziciaci5
Siłaviki raskazali, jak hrodzienskija błohiery tracili miljon, sabrany nibyta na lačeńnie dziciaci
«Narod pamiraje, i balnic nie treba. Hałoŭnaje prezidenckaja i deputackaja!!!». Što ludzi pišuć pra zakryćcio reabilitacyjnaha centra na Homielščynie1010
Kamientary