Papraŭki ŭ mihracyjnaje zakanadaŭstva FRH, jakija admianiajuć prava na atrymańnie pašparta Hiermanii paśla troch hadoŭ pražyvańnia ŭ krainie pry asablivych dasiahnieńniach u śfiery intehracyi, atrymali padtrymku Bundestahu.
Zakonaprajekt, jaki praduhledžvaje admienu prava na atrymańnie hramadzianstva FRH pa paskoranaj pracedury — za try hady, byŭ padtrymany bundestaham padčas hałasavańnia ŭ sieradu, 8 kastryčnika, piša Deutsche Welle.
Admiena prava na paskoranaje atrymańnie hramadzianstva FRH prapisana ŭ kaalicyjnaj damovie błoka chryścijanskich partyj CHDS/CHSS i Sacyjał-demakratyčnaj partyi Hiermanii.
U kancy maja kiraŭnik MUS Hiermanii Alaksandr Dobrynt nazvaŭ pamyłkaj «ekspres-naturalizacyju paśla troch hadoŭ pražyvańnia ŭ Hiermanii» i paabiacaŭ, što novy ŭrad «pakładzie hetamu kaniec». U intervju Bild jon udakładniŭ tady, što spadziajecca, što źmianieńnie zakanadaŭstva daść mahčymaść skaracić kolkaść chadajnictvaŭ ab prytułku ŭ krainie.
«Ekspres-naturalizacyja stvaryła dadatkovyja iłžyvyja stymuły dla nielehalnaj mihracyi. My likvidujem hetyja faktary pryciahnieńnia», — skazaŭ Dobrynt.
Dla pryniaćcia zakona ab admienie paskoranaj naturalizacyi adpaviednyja papraŭki ŭ mihracyjnaje zakanadaŭstva pavinien pryniać nie tolki bundestah, ale i bundesrat — pradstaŭnictva fiederalnych ziamiel FRH.
Zakon «śviatłafornaj kaalicyi» ab «ekspres-naturalizacyi»
Pavodle zakona, pryniataha papiarednim uradam Hiermanii i jaki ŭstupiŭ u siłu ŭ červieni 2024 hoda, hramadzianstva FRH možna było atrymać paśla troch hadoŭ pražyvańnia ŭ krainie ŭ vypadku «asabliva stanoŭčych intehracyjnych dasiahnieńniaŭ». Idzie havorka kankretna pra asablivyja pośpiechi ŭ škole abo na pracy; udzieł u hramadskaj pracy, naprykład, u pažarnaj družynie abo ŭ sacyjalnaj śfiery; zdolnaść utrymlivać siabie i členaŭ siamji; vałodańnie niamieckaj movaj na ŭzroŭni S1. Akramia hetaha, zastavalisia ahulnyja patrabavańni — treba było prajści test na viedańnie pravavoha i hramadskaha ładu Hiermanii, nie mieć kanfliktaŭ z zakonam.
Kolkaść zajavak na atrymańnie niamieckaha hramadzianstva ŭ apošnija hady rasła. Tak, u 2023 hodzie ich było padadziena bolš za 200 tysiač. Adna z pryčyn pryvabnaści niamieckaha pašparta ŭ tym, što jon daje mahčymaść padarožničać bieź vizy ŭ bolšaść krain śvietu.
Naturalizavanyja zamiežniki mohuć stracić hramadzianstva FRH na praciahu 10 hadoŭ z momantu atrymańnia pašparta. Heta praduhledžana ŭ vypadkach, kali, naprykład, pry padačy zajavy byli padadzieny iłžyvyja źviestki.
Inšyja źmieny, uniesienyja ŭ zakon ab hramadzianstvie papiarednim uradam, u tym liku prava na naturalizacyju praź piać hadoŭ i mahčymaść mieć padvojnaje hramadzianstva, zastajucca ŭ sile.
Ciapier čytajuć
28‑hadovaj biełaruscy paśla žudasnaj avaryi ŭ Tajłandzie nie mohuć akazać dapamohu — niama patrebnaj kryvi1
Kamientary