Dynamična mianiajecca situacyja ŭ žyćci Alaksandra Šakucina, «biznesmiena ŭdačy» pry Łukašenku. Budučy zatrymanym u pačatku tydnia, jon užo, jak stała viadoma «Našaj Nivie», na svabodzie. U SIZA jaho pratrymali 72 hadziny.
10 kastryčnika «Naša Niva» paviedamlała, što ŭ pačatku tydnia byŭ zatrymany Alaksandr Šakucin, zbankrutavały biźniesmien ź pieršaha koła Łukašenki, były ŭłaśnik «Amkadora».
Paśla hetaha my atrymali niekalki ananimnych paviedamleńniaŭ z raźvićciom historyi. Nam udałosia paćvierdzić ich.
Kali skłaści ŭsio razam, to atrymlivajecca, što Šakucin byŭ zatrymany ŭ aŭtorak, 7 kastryčnika. I pravioŭ u SIZA (imavierna, u SIZA KDB) 72 hadziny. Na hety momant jon užo na svabodzie.
Jakija padazreńni pradjaŭleny Šakucinu i ŭ čym ich sutnaść, nieviadoma.
Blizkaja da «Amkadora» krynica śćviardžaje, što adbyvajecca niejkaje padatkovaje raźbiralnictva pa starych spravach pradpryjemstva.
***
Raniej «Naša Niva» ŭžo raskazvała, što trajektoryja losu Šakucina nahadvaje situacyju ź Juryjem Čyžom.
Majučy za košt siabroŭstva z Łukašenkam prosta nierealnyja rynkavyja pieravahi kštałtu mahčymaści masavych pryvatyzacyj na bankaŭskija hrošy, ilhotnyja kredyty, śpisańni daŭhoŭ, pierakredytavańni dziaržavaj, pramocyju na rasijskim rynku i hetak dalej, što Čyž, što Šakucin tak i nie zmahli za dziesiacihodździ «łafy» stać paśpiachovymi biznesmienami. Čyž ciapier sudzicca sa svajoj siamjoj za pareštki byłoj biznes-impieryi. A Šakucin zahnaŭ «Amkador» u bankroty i zrabiŭ prablemaj dziaržavy svoj hihancki — u sotni miljonaŭ dalaraŭ — doŭh pierad kitajcami.
Čytajcie historyju padzieńnia biźniesa Šakucina: Šakucin zalacieŭ minimum na $40 miljonaŭ
U sakaviku 2025 hoda «Naša Niva» paviedamiła, što Łukašenka adabraŭ u Šakucina «Amkador», pieradaŭšy pradpryjemstva pad kantrol BiełAZa.
Čytajcie taksama: Łukašenka nacyjanalizavaŭ «Amkador». Šakucin staŭ prostym biełaruskim piensijanieram
Šakucin niekalki miesiacaŭ jašče zastavaŭsia bienieficyjaram i saŭładalnikam niekalkich zavodaŭ i dystrybjutarskaj sietki «Amkadora» ŭ Rasii, ale taksama vyjšaŭ z dolaŭ.
Čytajcie taksama: U Šakucina zabrali harotny daŭhabud «Šanter Chił» kala Drazdoŭ
U kancy krasavika 2025 hoda Łukašenka naviedaŭ «Amkador» i skazaŭ, što «najbližejšym časam daviadziecca vielmi mocna papracavać na «Amkadory», jaki znachodzicca ŭ składanym stanoviščy praź dziejańni [minułaha] ŭładalnika».
AAT «Amkador» — biełaruskaja mašynabudaŭničaja kampanija. Zajmajecca vytvorčaściu i realizacyjaj śpiecyjalnych mašyn dla darožna-budaŭničaj, łahistyčnaj, torfazdabyŭnoj, kamunalnaj, lasnoj, sielskahaspadarčaj halin. U strukturu chołdynhu «Amkador» uvachodzili bolš za 25 pradpryjemstvaŭ.
Alaksandr Šakucin naradziŭsia ŭ 1959 hodzie ŭ vioscy Vialikaje Babina Aršanskaha rajona. Pačynaŭ jak traktaryst kałhasa «Radzima». Zakončyŭ Biełaruski dziaržaŭny miedycynski ŭniviersitet pa śpiecyjalnaści «chirurh». Pracavaŭ zahadčykam chirurhičnaha adździaleńnia 10‑j minskaj balnicy, dyrektaram miedcentra MTZ. U jakaści prezidenta pradpryjemstva «Prammiedinviest» zajmaŭsia pastaŭkami miedycynskaha abstalavańnia. Staŭ akcyjanieram «Amkadora», uznačaliŭ kampaniju. Byŭ členam Savieta respubliki, uznačalvaŭ Biełaruskuju tenisnuju fiederacyi.
Ciapier čytajuć
Rabotnicy «Minsk-Areny» dali kałoniju za «sadziejničańnie ekstremizmu»1
Rabotnicy «Minsk-Areny» dali kałoniju za «sadziejničańnie ekstremizmu»
«Ja suprać. Movy, jakija pakinuli paśla siabie kałanizatary ŭ Afrycy, stali šlacham da cyvilizacyi». Aleksijevič adkazała, jak stavicca da admovy ad ruskaj movy va Ukrainie8989
Kamientary