Tudy pryjšła pravierka, pracuje sanstancyja, ustanova pa adrasie pa adrasie praśpiekt Niezaležnaści, 154D nie pracuje.
U redakcyju Onliner źviarnuŭsia małady čałaviek pa imieni Michaił (imia źmieniena) i raskazaŭ, što trapiŭ u infiekcyjnuju balnicu paśla abiedu ŭ minskim bistro «Pit Stop», što znachodzicca na vulicy Niezaležnaści, 154D.
Pavodle słoŭ Michaiła, u adździaleńni znachodziacca jašče niekalki čałaviek, jakija taksama atrucilisia ŭ hetym samym restaranie.
Michaił vučycca na apošnim kursie ŭniviersiteta. Zvyčajna, pavodle jaho słoŭ, jon abiedaje ŭ restaranie chutkaha charčavańnia «Pit Stop». U aŭtorak, 7 kastryčnika, małady čałaviek zamoviŭ na abied hrybny sup, pastu karbanara i kurynuju katletu. Ježa, zapeŭnivaje jon, była zvyčajnaj.
— Mianie ničoha nie naściarožyła ni ŭ pachu, ni ŭ smaku. Adnak da viečara, kali ŭžo byŭ doma, mnie stała drenna: niekalki razoŭ schadziŭ u prybiralniu, ale nie nadaŭ hetamu značeńnia, bo ničoha nie baleła.
U sieradu, pavodle słoŭ surazmoŭcy, jamu stała značna horš. Michaił sprabavaŭ pić tabletki, ale stan paharšaŭsia: tempieratura padniałasia da 39 hradusaŭ, byli mocnyja vanity.
— Chutkuju nie vyklikaŭ, bo ŭ čaćvier ranicaj u mianie byŭ dziaržaŭny ekzamien — zdaŭ, i ŭžo paśla hetaha vyklikali chutkuju. Mianie advieźli ŭ infiekcyjnuju balnicu, dyjahnaz (užo paćvierdžany) — salmanieloz.
Pry pastupleńni ŭ adździaleńnie doktar skazaŭ, što takich, jak ja, — siem čałaviek.
U balnicy, pavodle słoŭ Michaiła, jon praviadzie jak minimum tydzień. Chłopiec užo straciŭ čatyry kiłahramy, jaho arhanizm byŭ mocna abiazvodžany.
Pazaŭčora Michaiłu telefanavali z sanstancyi, udakładniali, što i dzie jon jeŭ. Žurnalisty taksama sprabavali źviazacca ź miedykami, ale pakul heta zrabić nie ŭdałosia.
— Ničoha nie mahu vam skazać nakont atručvańnia. U restaranie ŭčora i siońnia prachodzić pravierka sanstancyjaj. Z učorašniaha dnia ŭstanova nie pracuje, — skazali ŭ restaranie.
Paśla publikacyi z redakcyjaj Onliner.by źviazalisia jašče dvoje ludziej, u jakich, pavodle ich słoŭ, svajaki taksama znachodziacca ŭ infiekcyjnaj balnicy paśla atručvańnia ŭ «Pit Stop». Tak, minčanka Darja raskazała: jaje muž abiedaŭ u aŭtorak (7 kastryčnika) u bistro na Niezaležnaści, 154D. Tam jon jeŭ karbanara i sałatu z burakoŭ.
— Da viečara jamu stała drenna. Adrazu pačałasia dyjareja, zatym pačaŭsia mocny bol u žyvacie (bol rezki), paśla — mocnyja vanity. Taksama padniałasia tempieratura kala 39 hradusaŭ, jakaja na praciahu sutak ničym nie źbivałasia, a tolki pavyšałasia. Padstavaj dla vykliku chutkaj stała tempieratura 40,2 hradusa i pačarniełyja vusny praz sutki (to-bok užo ŭ sieradu, 8 kastryčnika). Pakul muž jašče znachodzicca ŭ balnicy. Dakładny dyjahnaz jamu pastaviać pry vypiscy, jakaja papiarednie pryznačana na paniadziełak, 13 kastryčnika.
Darja i jaje muž rašuča nastrojeny damahacca kampiensacyi ad ustanovy. Paciarpiełych, jakija chočuć dałučycca, dziaŭčyna prosić źviazacca ź joj praz Telegram-bot redakcyi.
Krychu paźniej u redakcyju Onliner.by napisaŭ Alaksandr: jon raskazaŭ, što abiedaŭ u tym ža bistro ŭ paniadziełak (6 kastryčnika) razam z 12‑hadovym synam. Dzicia taksama ciapier znachodzicca ŭ balnicy.
— Syn braŭ karbanara i katletu (nie pamiataju dakładnaj nazvy). U aŭtorak jamu stała drenna. U noč z aŭtorka na sieradu jaho z vysokaj tempieraturaj, vanitami i dyjarejaj pakłali ŭ infiekcyjnuju balnicu. Učora paćvierdzili salmanieloz.
Ciapier z synam u balnicy znachodzicca žonka. Dakumienta, jaki paćviardžaje dyjahnaz, pakul niama, dumaju, što vydaduć pry vypiscy. Praz kropielnicu daktary płanujuć uvodzić antybijotyk jašče 5—7 dzion. Z daktarami na temu atručvańnia nie razmaŭlali, bo da pračytańnia artykuła nie zdahadvalisia, dzie jon moh zarazicca.
Kamientary