U Kramli zajavili pra «surjoznuju zaniepakojenaść» z-za mahčymych pastavak «Tamahaŭkaŭ» Kijevu
Rakiety majuć vysokuju dalokaść i mohuć być jak u jadziernym, tak i ŭ biaźjadziernym vykanańni, zajaviŭ Dźmitryj Piaskoŭ. Ale jany ŭsio roŭna nie źmieniać situacyju na poli boju, dadaŭ jon.
Tema mahčymych pastavak Ukrainie kryłatych rakiet «Tamahaŭk» vyklikaje ŭ Rasii surjoznuju zaniepakojenaść, zajaviŭ pres-sakratar prezidenta Rasii Dźmitryj Piaskoŭ.
«Zbroja heta asablivaja, moža być u biaźjadziernym, jadziernym vykanańni. Vysokaja dalokaść zbroi, surjoznaja», — skazaŭ Piaskoŭ, adznačyŭšy pry hetym, što «Tamahaŭki» nie mohuć źmianić situacyju na poli boju.
Piaskoŭ adznačyŭ, što Rasija vyvučaje zajavy, jakija hučać na Zachadzie nakont imaviernaj pieradačy rakiet. Ciapier «vielmi dramatyčny momant z punktu hledžańnia taho, što z usich bakoŭ nahniatajecca napružanaść».
Na pytańnie prapahandysta Zarubina, «ci moža Rasija padazravać», što rakieta pry zapusku moža być u jadziernym vykanańni, Piaskoŭ adkazaŭ: «Ujavicie sabie, rakieta ź vialikim radyusam dziejańnia ŭźlataje i lacić, i my viedajem, što jana moža być u jadziernym vykanańni. Što dumać Rasijskaj Fiederacyi? Vajennyja ekśpierty za akijanam pavinny ž heta razumieć».
Rasija pa-raniejšamu hatova da ŭrehulavańnia i robić vysnovu, što palityčnuju volu da praciahu pieramoŭ zachoŭvaje prezident ZŠA Donald Tramp, adnak Jeŭropa i Ukraina hetaha nie chočuć, dadaŭ Piaskoŭ.
U pačatku kastryčnika prezident ZŠA Donald Tramp zajaviŭ, što «ŭ peŭnaj stupieni pryniaŭ rašeńnie» ab pastaŭkach rakiet Kijevu. Kreml papiaredziŭ, što taki krok stanie «surjoznym vitkom eskałacyi». Uładzimir Pucin pahražaŭ, što pastaŭka Kijevu «Tamahaŭkaŭ» razburyć adnosiny z ZŠA.
U rasijskim Ministerstvie zamiežnych spraŭ zajavili, što ZŠA «pavinny razumieć ciažar nastupstvaŭ» pieradačy Ukrainie dalnabojnych rakiet «Tamahaŭk».
Kamientary