Z bataničnaha sadu ŭ Hiermanii skrali hihanckuju raślinu, jakaja mocna śmiardzić padłaj
Z bataničnaha sadu ŭ niamieckim horadzie Dortmund pry zahadkavych abstavinach źnik kłubień raśliny pad nazvaj amorfafałus tytaničny. Jon viadomy svajoj nadzvyčna śmiardziučaj kvietkaj, jakaja pryciahvaje natoŭpy naviedvalnikaŭ, piša Spiegel.
Nieviadomyja vykapali kłubień vahoj kala 20—30 kiłahramaŭ z kadki, u jakoj jon ros. Jak paviedamlajecca, bataničny sad źviarnuŭsia z hetaj nahody ŭ palicyju.
Amorfafałus tytaničny (Amorphophallus titanum) pachodzić ź indaniezijskaha vostrava Sumatra i naležyć da siamiejstva aroidavych. Jon ćvicie tolki raz na niekalki hadoŭ i tolki niekalki dzion. Pry hetym maje najbujniejšaje sukviećcie ŭ śviecie i raspaŭsiudžvaje mocny pach hniłoha miasa.
Niaścierpny smurod dapamahaje raślinie pry apyleńni: jon pryvablivaje nasiakomych, jakija šukajuć miesca dla adkładańnia jajek — nibyta na trupie.
Padčas ćvicieńnia dortmunskaj raśliny, jakoj dali nazvu «David», u 2018 i 2021 hadach, pavodle źviestak haradskich uładaŭ, u bataničny sad pryjšli tysiačy naviedvalnikaŭ, kab ubačyć hetuju niezvyčajnuju źjavu.
Apošni raz «David» vypuściŭ list, jaki zaviaŭ u kancy vieraśnia. Paśla hetaha kłubień byŭ znoŭ pakryty ziamloj, i z hetaha skarystalisia złamyśniki.
Padčas čarhovaj pravierki sadoŭniki zaŭvažyli, što kłubień źnik, i heta stała dla ich sapraŭdnym udaram. Materyjalnuju kaštoŭnaść skradzienaj raśliny vyznačyć ciažka, ale dla horada heta vialikaja strata.
«Mnohija žychary Dortmunda čakali nastupnaha ćvicieńnia. My spadziajomsia, što złodziei paškadujuć pra svoj učynak i viernuć Davida nazad», — kažuć supracoŭniki bataničnaha sadu.
25 hruš na adnoj halincy vyraściŭ piensijanier z-pad Baranavičaŭ
Amierykanski matylok pajadaje Homielščynu. Drevy — jak ź filmaŭ žachaŭ
Ci možna pryvieźci z-za miažy vazon z raślinaj? Adkazali mytniki
«Jašče b barščeŭnik dadała». Dziaŭčyna sabrała dziciaci na liniejku ŭ škołu bukiet palavych kvietak i narvałasia na chejt
Kamientary