Parłamient Francyi nie padtrymaŭ adrazu dva prapanavanyja votumy niedavieru ŭradu, tamu Siebaśćien Lekarniu zastajecca premjer-ministram. Adnak, choć ŭrad Lekarniu hetym razam i ŭtrymaŭsia, pracavać jamu ciažka, bo jon nie maje bolšaści ŭ Nacyjanalnaj asamblei, piša Bi-bi-si.
16 kastryčnika Siebaśćien Lekarniu pavinien byŭ prajści dva votumy niedavieru: adzin prapanavała pravaja partyja «Nacyjanalnaje abjadnańnie» pad kiraŭnictvam Maryn Le Pien, druhi — radykalny levy ruch «Niaskoranaja Francyja».
Najbolšaja pahroza dla ŭrada išła ad ultralevych, ale jany navat z padtrymkaj niekatorych inšych apazicyjnych partyj nabrali tolki 271 hołas zamiest nieabchodnych 289. Partyja Le Pien taksama nie nabrała dastatkova hałasoŭ.
Rašeńnie ab tym, kab nie adpraŭlać urad u adstaŭku, častkova abumoŭlena kampramisami Lekarniu z apazicyjnymi sacyjalistami. Ale «Niaskoranaja Francyja» niezadavolenaja tym, što sacyjalisty padtrymali ŭrad, a tamu płanuje navat padać prapanovu ab impičmiencie prezidentu Emanuelu Makronu, choć pośpiech hetaj inicyjatyvy małavierahodny.
Paśla minułahodnich vybaraŭ nivodnaja francuzskaja partyja nie maje bolšaści ŭ parłamientie. Za apošni hod u Francyi adzin za adnym padali ŭ adstaŭku try premjery. Pieršy ŭrad Siebaśćiena Lekarniu praisnavaŭ usiaho 27 dzion, ale prezident Makron praź niekalki dzion paśla adstaŭki znoŭ pryznačyŭ jaho premjeram. Lekarniu sfarmavaŭ skład druhoha ŭrada i vystupiŭ u parłamientie, što častkova ŭmacavała jaho pazicyi.
Ciapier hałoŭnaja zadača Lekarniu — damahčysia zaćviardžeńnia biudžetu Francyi na 2026 hod. Jon taksama abviaściŭ pra adterminoŭku pavyšeńnia piensijnaha ŭzrostu z 62 da 64 hadoŭ da prezidenckich vybaraŭ 2027 hoda, što dapamahło atrymać padtrymku sacyjalistaŭ.
Adnak praca ŭrada budzie ciažkoj: kožnaje rašeńnie treba pravodzić praz parłamient, zaklučajučy časovyja sajuzy z roznymi partyjami. U hramadstvie adnosiny da novaha ŭrada taksama supiarečlivyja: častka nasielnictva choča stabilnaści, ale davier da Lekarniu zastajecca nizkim.
Kamientary