Raptoŭna pamior 29‑hadovy hrosmajstar i papularny anłajn-kamientatar Denieł Naradzicki
Amierykanski šachmatny hrosmajstar i papularny anłajn-kamientatar Denieł Naradzicki pamior va ŭzroście 29 hadoŭ.
Pra jaho śmierć paviedamiła siamja ŭ zajavie, apublikavanaj šachmatnym kłubam Charlotte Chess Center u paniadziełak. Pryčyna śmierci nie raskryvajecca, piša Bi-bi-si — Ukraina.
«Z hłybokim smutkam paviedamlajem pra raptoŭnuju śmierć Denieła Naradzickaha. Jon byŭ talenavitym šachmatystam, kamientataram i piedahoham — ulubionym i pavažanym členam šachmatnaj supolnaści, jaki natchniaŭ prychilnikaŭ i kalehaŭ pa ŭsim śviecie», — havorycca ŭ zajavie.
Naradzicki pachodziŭ ź siamji jaŭrejskich imihrantaŭ z SSSR. Jaho baćka, Uładzimir, pryjechaŭ u ZŠA z Ukrainy, a maci Alena — z Azierbajdžana.
Pamiać pra Naradzickaha ŭšanavali šachmatnyja fiederacyi ZŠA i inšych krain, a taksama šmat viadučych hulcoŭ.
Vice-čempijon śvietu, amierykaniec Chikaru Nakamura, pryznaŭsia, što byŭ ašałomleny hetaj navinoj. «Heta vielizarnaja strata dla ŭsiaho šachmatnaha śvietu», — napisaŭ jon u sacsietkach.
Denieł zacikaviŭsia šachmatami ŭ šeść hadoŭ — brat Ałan pakazaŭ jamu hulniu, kab zabaŭlać dziaciej na dni narodzinaŭ.
Baćka Uładzimir i niekalki trenieraŭ chutka zaŭvažyli vyklučny talent chłopčyka.
«Ja dumaŭ, što prosta hulaju z bratam», — uspaminaŭ Naradzicki ŭ intervju New York Times u 2022 hodzie.
U 2007 hodzie juny šachmatyst zavajavaŭ tytuł čempijona śvietu siarod chłopčykaŭ da 12 hadoŭ u tureckaj Antalji.
Užo ŭ 14 hadoŭ jon napisaŭ knihu Mastering Positional Chess — adnu ź pieršych pracaŭ, stvoranych padletkam-hrosmajstram, dzie analizavaŭ pazicyjnuju hulniu i praktyčnyja pryjomy.
U 2013 hodzie Naradzicki staŭ pieramožcam moładzievaha čempijanatu ZŠA i atrymaŭ zvańnie hrosmajstra — najvyšejšy tytuł, jaki prysvojvaje Mižnarodnaja šachmatnaja fiederacyja (FIDE).
Jon skončyŭ Stenfardski ŭniviersitet, paśla čaho vykładaŭ šachmaty ŭ horadzie Šarłot (štat Paŭnočnaja Karalina).
Paralelna z vystupami na turnirach Naradzicki aktyŭna raźvivaŭsia anłajn. Jaho YouTube-kanał sabraŭ amal 500 tysiač padpisčykaŭ, a tranślacyi na Twitch — bolš za 340 tysiač.
Tysiačy hledačoŭ rehularna hladzieli jaho navučalnyja videa i pramyja efiry z partyjaŭ.
Prychilniki piaščotna nazyvali jaho Dania i adznačali jaho hłybokija analityčnyja zdolnaści, pačućcio humaru i ščyruju luboŭ da hulni.
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary