KNDR zapuściła niekalki balistyčnych rakiet za tydzień da samitu ŭ Paŭdniovaj Karei
Paŭnočnaja Kareja zapuściła niekalki balistyčnych rakiet małoj dalokaści ŭ bok Japonskaha mora kala ŭschodniaha ŭźbiarežža krainy — heta pieršy taki zapusk za niekalki miesiacaŭ i ŭsiaho za tydzień da taho, jak suśvietnyja lidary, uklučajučy prezidenta ZŠA Donalda Trampa, prybuduć u Paŭdniovuju Kareju na samit Azijacka-Cichaakijanskaha ekanamičnaha supracoŭnictva, piša Bi-bi-si.
Apošni raz Pchieńjan zapuskaŭ balistyčnyja i kryłatyja rakiety małoj dalokaści ŭ mai. Heta pieršy zapusk, ažyćcioŭleny KNDR pry paŭdniovakarejskim prezidencie Li Čže Mienie. Jon ustupiŭ na pasadu ŭ červieni i paabiacaŭ prykłaści ŭsie namahańni dziela źmianšeńnia vajennaj napružanaści na Karejskim paŭvostravie.
Pavodle źviestak paŭdniovakarejskich vajskoŭcaŭ, balistyčnyja rakiety małoj dalokaści pralacieli kala 350 km.
«Našy vajskoŭcy ŭzmacnili manitorynh u miežach padrychtoŭki da mahčymych dadatkovych zapuskaŭ i padtrymlivajuć pastajannuju hatoŭnaść, adnačasova abmieńvajučysia adpaviednaj infarmacyjaj z ZŠA i Japonijaj», — zajavili paŭdniovakarejskija vajskoŭcy.
Samit Azijacka-Cichaakijanskaha ekanamičnaha supracoŭnictva projdzie ŭ Paŭdniovaj Karei z 31 kastryčnika pa 1 listapada. Tramp, jak čakajecca, pryjedzie ŭ Sieuł 29 kastryčnika. U svoj pieršy prezidencki termin Tramp try razy sustrakaŭsia z Kim Čen Ynam i niadaŭna skazaŭ, što chacieŭ by jašče raz sustrecca z paŭnočnakarejskim lidaram, «mahčyma, u hetym hodzie».
Dziaržaŭnyja ŚMI KNDR pieradali, što Kim adkryty da pieramovaŭ, kali ZŠA admoviacca ad idei denuklearyzacyi Paŭnočnaj Karei. U kastryčniku ŭłady Paŭnočnaj Karei prademanstravali novuju mižkantynientalnuju balistyčnuju rakietu «Chvason-20» na vajskovym paradzie ŭ honar 80‑hodździa z dnia zasnavańnia Partyi pracy Karei.
Kamientary