Tramp i Si sustrelisia ŭ Paŭdniovaj Karei i rasstalisia moŭčki. Tramp zahadaŭ adnavić jadziernyja vyprabavańni
Prezident ZŠA Donald Tramp i staršynia KNR Si Czińpin praviali dvuchbakovuju sustreču ŭ paŭdniovakarejskim horadzie Pusan — pieršuju z pačatku druhoha terminu Trampa.
Sustreča praciahvałasia hadzinu 40 chvilin, daŭžej, čym na jaje advodziłasia času ŭ hrafiku prezidenta ZŠA. Paśla jaje nijakich zajaŭ ni toj, ni druhi lidar jašče nie rabili, paviedamlaje Bi-bi-si.
Tramp užo pakinuŭ Paŭdniovuju Kareju i lacić nazad u Vašynhton. Si dalej voźmie ŭdzieł u samicie ATES.
Tramp i śledam za im Si pryziamlilisia ŭ Pusanie mienš čym za hadzinu da pačatku sustrečy.
Vitajučy kitajskaha lidara, Tramp pierad kamierami skazaŭ, što čakaje vielmi paśpiachovaj sustrečy. Si, sa svajho boku, zaŭvažyŭ, što za dzieviać miesiacaŭ prezidenctva Trampa jany try razy havaryli pa telefonie i abmieńvalisia listami.
«Dla dźviuch viadučych ekanomik śvietu narmalna čas ad času adčuvać treńnie», — dadaŭ kitajski kiraŭnik.
Pry hetym Si skazaŭ, što nie raz kazaŭ publična, što ZŠA i Kitaj «pavinny być siabrami i partniorami». «Heta toje, čamu nas navučyła historyja i čaho patrabuje realnaść», — padkreśliŭ jon.
Paśla hetych remarak Si i Tramp pajšli na pieramovy za začynienymi dźviaryma. Z amierykanskaha boku na ich prysutničajuć dziaržsakratar Marka Rubia, handlovy pradstaŭnik Džejmisan Hryr, ministr finansaŭ Skot Biesient, ministr handlu Hovard Łatnik, kiraŭnik aparata Siuzi Uajłz i pasoł ZŠA ŭ Kitai Devid Pierdju.
U kitajskuju delehacyju ŭvajšli ministr zamiežnych spraŭ Van I, jaho namieśnik Ma Čžaasiuj, vice-premjer Dziaržsavieta Che Lifen, kiraŭnik aparata Caj Ci, ministr kamiercyi Van Veńtaa, staršynia Dziaržaŭnaha kamiteta pa raźvićci i reformach Čžen Šańczie.
Hałoŭnych pytańniaŭ na pieramovach było try:
Taryfy: Tramp vykazvaŭ hatoŭnaść panizić pošliny na impart z Kitaja ŭ abmien na supracoŭnictva ŭ baraćbie z ekspartam kampanientaŭ narkotyku fientaniłu.
Redkaziamielnyja mietały i čypy dla ŠI: takija kampanii, jak Nvidia, chočuć pradavać u Kitaj vysokapradukcyjnyja čypy. Adnak ZŠA ličać heta pytańniem svajoj nacyjanalnaj biaśpieki, pakolki hetyja ž čypy mohuć być źviernuty Kitajem na vajennyja mety. Kitaj, sa svajho boku, kantraluje bolšuju častku suśvietnaj vytvorčaści redkaziamielnych mietałaŭ, jakija šyroka prymianiajucca ŭ samych roznych vysokatechnałahičnych praduktach.
TikTok: ministr finansaŭ ZŠA Skot Biesient na hetym tydni kazaŭ, što kančatkovaje pahadnieńnie ab prodažy amierykanskaha siehmienta sietki TikTok moža być dasiahnuta na samicie Trampa i Si. Adnak novaj infarmacyi ab umovach hetaj ździełki z taho času nie źjaviłasia.
Usio heta adsunuła inšyja prablemy ŭ dvuchbakovych adnosinach, takija jak kitajskaja padtrymka rasijskaj vajny suprać Ukrainy, na druhi płan.
Niezadoŭha da pačatku sustrečy Tramp apublikavaŭ na svaim sajcie Truth Social dopis ab «nieadkładnym» adnaŭleńni jadziernych vyprabavańniaŭ ZŠA, prama zhadaŭšy Kitaj.
«Rasija na druhim miescy, a Kitaj ź vialikim adstavańniem na trecim, ale na praciahu piaci hadoŭ jon z nami zraŭniajecca», — napisaŭ amierykanski prezident.
Kamientary