Biełaruś zabiaśpiečvaje techničnaje absłuhoŭvańnie elemientaŭ rasijskich stratehičnych jadziernych sił — «Biełpoł»
Pa infarmacyi, jakuju atrymaŭ «Biełpoł», pradpryjemstva chołdynhu «Amkador» udzielničaje ŭ ramoncie i techničnym absłuhoŭvańni aparatury šachtavych rakietnych kompleksaŭ, jakija vykarystoŭvajucca Rasijaj u sistemie mižkantynientalnych rakiet «Satana» i «Avanhard».
U svaim novym rasśledavańni «Biełpoł» dzielicca novymi padrabiaznaściami militaryzacyi biełaruskaj ekanomiki. Rasśledavalniki źviartajuć asablivuju ŭvahu na ŭnitarnaje pradpryjemstva SVT, jakim vałodaje «Amkador-Biełvar» i jakoje ŭvachodzić u skład chołdynhu «Amkador».
Raniej było viadoma, što pradpryjemstva ŭžo niekalki hadoŭ zajmajecca raspracoŭkaj vajskovych prajektaŭ, u tym liku bieśpiłotnika pad šyfram «Śvisłač-SVT» i sistemy naviadzieńnia artyleryjskaha ahniu «Vartavy».
Novyja danyja śviedčać, što ŭdzieł UP SVT u rasijskich abaronnych prahramach značna šyrejšy.
Pavodle dakładu Hrupy 1281 vajskovaha pradstaŭnictva Ministerstva abarony Rasii, jaki trapiŭ u rasparadžeńnie «Biełpoła», pradpryjemstva vykonvała kantrakty ŭ miežach dziaržaŭnaha abaronnaha zakazu 2023 hoda, u tym liku ramantavała i absłuhoŭvała prybory, jakija vykarystoŭvajucca dla kantrolu raschodu paliva ŭ vajskovaj technicy.
Akramia taho, UP SVT zajmałasia ramontam aparatury, što ŭvachodzić u sistemy kiravańnia savieckich šachtavych rakietnych kompleksaŭ P-135 i P-118.
Kompleks P-118 (15P118) — heta stratehičnaja rakietnaja sistema ź mižkantynientalnaj rakietaj R-36M UTTCH, viadomaj pad nazvaj «Satana», zdolnaj nieści termajadzierny zarad. Choć hety vid uzbrajeńnia musiŭ być źniaty z bajavoha dziažurstva, Rasija praciahvaje jaho ekspłuatacyju.
Kompleks P-135 (15P135) taksama adnosicca da mižkantynientalnych balistyčnych rakiet šachtavaha bazavańnia, jakija ŭ sučasnych umovach vykarystoŭvajucca ŭ jakaści nośbitaŭ kiravanych bajavych błokaŭ u kompleksie «Avanhard». Va ŭsich hetych sistemach biełaruskija kampanienty i servisnaje absłuhoŭvańnie adyhryvajuć istotnuju rolu.
Pieravozku takich hruzaŭ u Rasiju ažyćciaŭlaje dziaržaŭnaje pradpryjemstva RUP «Śpiecsuviaź», jakoje ŭžo fihuravała ŭ raniejšych rasśledavańniach «Biełpoła» jak struktura, što dapamahaje abychodzić sankcyi, u tym liku pry pastaŭkach rasijskich ałmazaŭ.
«Biełpoł» padkreślivaje, što havorka idzie nie pra dapamohu Rasii ŭ ahulnavajskovaj vytvorčaści, a pra pramoje ŭciahvańnie biełaruskaha pradpryjemstva ŭ techničnaje absłuhoŭvańnie elemientaŭ rasijskich stratehičnych jadziernych sił. Heta ŭpieršyniu paćvierdžana aficyjnymi rasijskimi dakumientami, jakija trapili ŭ rasparadžeńnie analitykaŭ.
Prakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary