U Słucku kamunalniki nie prybirajuć jamu na darozie vakoł luka, bo luk u pryvatnaj ułasnaści
U Słucku miascovy žychar źviarnuŭ uvahu na niebiaśpiečnuju jamu na vulicy Bahdana Chmialnickaha, jakaja źjaviłasia z-za prasadki luka. Mužčyna adznačaje, što heta nie prosta niazručnaść, a realnaja pahroza biaśpiecy, bo tut štodnia prajazdžajuć sotni aŭtamabilaŭ. Ale ŭ kamunalnych słužbaŭ jość važkaja pryčyna, kab hety zvarot nie brać pad uvahu, piša «Minskaja praŭda».
Paśla zvarotu ŭ słužbu «115» mužčynu paviedamili, što luk znachodzicca ŭ pryvatnaj ułasnaści, i jaho absłuhoŭvańnie pavinna ažyćciaŭlacca za košt uładalnika. Tamu zajavu zakryvajuć, bo horad za luk adkaznaści nie niasie.
«Zhodna z aktam bałansavaha raźmiežavańnia, kanalizacyjny kałodziež, raźmieščany pa vulicy Bahdana Chmialnickaha, 54, znachodzicca ŭ pryvatnaj ułasnaści. U suviazi z hetym KUP «Słuckvodakanał» nie ažyćciaŭlaje jaho absłuhoŭvańnie.
U adpaviednaści ź dziejnym zakanadaŭstvam ułaśnik abaviazany samastojna zabiaśpiečvać naležnaje ŭtrymańnie i ramont majomaści, jakaja jamu naležyć, uklučajučy kanalizacyjnyja kałodziežy.
Pa fakcie vyjaŭlenaha pravału asfaltu KUP «Słuckvodakanał» rekamienduje ŭłaśnikam kałodzieža aformić piśmovy zvarot ad imia zacikaŭlenych asob z prośbaj ab likvidacyi defiektu na płatnaj asnovie.
Taksama metazhodna źviarnucca ŭ arhanizacyi žyllova-kamunalnaj haspadarki albo darožnyja słužby dla vykanańnia rabot na płatnaj asnovie: śpiecyjalisty zmohuć skłaści kaštarys, zaklučyć damovu na akazańnie pasłuh i vykanać nieabchodny ramont», — napisana ŭ adkazie «Słuckvodakanała».
U svaju čarhu, KUP «Słuckaje ŽKH» vyjechała na miesca i dało ŭładalnikam kałodzieža pradpisańnie likvidavać prasadku luka.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ133
Kamientary