Kim Kardašjan zajaviła, što amierykancy nie vysadžvalisia na Miesiac
NASA zaprasiła jaje na zapusk «Artemidy».
Pradstaŭnik NASA adreahavaŭ na zajavu zorki realici-šou Kim Kardašjan pra toje, što misija 1969 hoda pa vysadcy pieršaha čałavieka na Miesiac była sfalsifikavanaja. Jon zaprasiŭ Kardašjan naviedać Kaśmičny centr imia Kienedzi, kab ubačyć zapusk miesiacovaj misii «Artemida», piša Bi-bi-si.
U niadaŭnim epizodzie svajho šou The Kardashians Kim Kardašjan zajaviła aktrysie Sary Połsan, što, na jaje dumku, vysadki na Miesiac nie było. Jana pakazała joj frahmient intervju z astranaŭtam Bazam Ołdrynam, jaki razam ź Niłam Armstranham pieršym stupiŭ na pavierchniu Miesiaca ŭ chodzie misii «Apałon-11».
«Ja adpraŭlu tabie miljon artykułaŭ z Bazam Ołdrynam i inšym», — zajaviła Kardašjan, a potym začytała cytatu Ołdryna ŭ adkaz na pytańnie pra samy strašny momant ekśpiedycyi:
«Strašnaha momantu nie było, bo ničoha takoha nie adbyłosia. Mahło być strašna, ale nie było — bo hetaha nie było».
Vidać, miełasia na ŭvazie vykazvańnie Ołdryna padčas vystupu ŭ Vialikabrytanii ŭ 2015 hodzie. Adnak jon nie śćviardžaŭ, što palot nie adbyŭsia — jon tolki skazaŭ, što «strašnaha momantu nie było». Paśla hetaha jaho paprasili raskazać historyju sa złamanym aŭtamatam vyklučalnika.
Paźniej, u razmovie z pradziusaram, Kardašjan znoŭ zajaviła, što nie vieryć u realnaść vysadki na Miesiac: «Ja dumaju, heta było falšyŭkaj. Ja bačyła niekalki videa, dzie Baz Ołdryn kaža, što hetaha nie było. Jon ciapier pastajanna heta kaža ŭ intervju. Moža, nam varta znajści Baza Ołdryna?»
Vykonvajučy abaviazki administratara NASA Šon Dafi adkazaŭ Kardašjan u sacyjalnych sietkach.
«Tak, my ŭžo byli na Miesiacy… šeść razoŭ!» — napisaŭ jon u Ch, tehnuŭšy zorku i apublikavaŭšy ŭryvak videa, dzie jana raskazvaje pra «Miesiacovuju zmovu». Adnačasova jon prarekłamavaŭ «Artemidu», ciapierašniuju prahramu daśledavańnia Miesiaca kaśmičnaha ahienctva ZŠA.
«My vyjhrali minułuju kaśmičnuju honku — i vyjhrajem hetuju taksama», — napisaŭ jon. U paście jon paznačyŭ i aficyjny akaŭnt prezidenta, pad kiraŭnictvam jakoha, jak vykazaŭsia Dafi, prahrama «viartaje nas na Miesiac».
Kardašjan napisała post u adkaz, spytaŭšy jaho pra abjekt 3I/Atlas, jaki astranomy nazyvajuć, mahčyma, samaj staražytnaj z kali-niebudź naziranych kamiet i źjaŭleńnie jakoha pryviało ŭ internecie da śpiekulacyj na temu inšapłaniecian.
«Pačakajcie… što tam z 3I Atlas?!?!!!!!!!?????» — spytała jana.
«Nijakich inšapłaniecian. Nijakaj pahrozy žyćciu na Ziamli», — adkazaŭ Dafi i rastłumačyŭ, što značać litary i ličby ŭ naźvie abjekta:
- 3 = treciaja
- I = interstellar (mižzorkavaja), to bok prylacieła z-za miežaŭ našaj Soniečnaj sistemy
- ATLAS = vyjaŭlena kamandaj Asteroid Terrestrial-Impact Last Alert System (Sistema rańniaha apaviaščeńnia ab asteroidnych sutyknieńniach ź Ziamloj)
Paśla hetaha Dafi adznačyŭ, što ŭ kaśmičnym ahienctvie rady prajaŭlenaj da «Artemidy» cikavaści, i aficyjna zaprasiŭ Kim na zapusk u Kaśmičnym centry imia Kienedzi.
Pieršy zapusk u ramkach misii «Artemida» adbyŭsia ŭ 2022 hodzie. Zapusk «Artemidy-2» zapłanavany na luty 2026 hoda, a pasadka «Artemidy-3» z ekipažam na Miesiac — na siaredzinu 2027 hoda.
Ołdryn, jakomu zaraz 95 hadoŭ, pakul nie prakamientavaŭ słovy Kardašjan. Faktčekiery, u tym liku ahienctva Reuters, raniej nieadnarazova vykryvali kanśpirałahičnyja teoryi, u jakich vykazvańni Ołdryna traktavalisia jak pryznańnie ŭ tym, što vysadki na Miesiac nie było. Teoryja «miesiacovaj zmovy», jakaja isnuje ŭžo niekalki dziesiacihodździaŭ, taksama była nieadnarazova źniapraŭdžana.
«Kožny arhumient, jaki śćviardžaje, što NASA sfalsifikavała vysadki na Miesiac, byŭ abvierhnuty», — adznačaje brytanski Instytut fiziki.
Kamientary