Luxvisage adkazaŭ na skarhi rasijanak, u jakich nibyta z-za biełaruskaha hiela masava vypadajuć brovy
Biełaruski kaśmietyčny brend Luxvisage adreahavaŭ na skarhi rasijanak, što ŭ ich pačali vypadać brovy z-za vykarystańnia papularnaha biełaruskaha hiela-fiksatara. Pra hetyja prablemy rasijanak navat paviedamiŭ rasijski telehram-kanał Baza, jaki śpiecyjalizujecca na kryminalnaj chronicy.
Pavodle kanała Baza, praz 3—4 miesiacy vykarystańnia hiela ad mnohich rasijanak pasypalisia skarhi. Jany śćviardžali, što brovy pačali radzieć, bo vałaski łamalisia i vypadali pry źniaćci makijažu. Śćviardžałasia, što hiel, jaki dziejničaje jak klej, vielmi składana zmyć navat admysłovymi srodkami i jon «ździrajecca razam z vałasinkami».
Kampanija Luxvisage apublikavała ŭ instahramie adkaz, vidavočna, reahujučy na rezanans u siecivie.
Brend nazvaŭ hiel Brow Laminator svaim «absalutnym biestsieleram».
«Kali pradukt sapraŭdy pracuje, heta zaŭsiody vyklikaje emocyi. Apošnim časam u siecivie źjavilisia dziŭnyja dopisy z adnolkavymi fota i tekstami. Padobna, miljony prodažaŭ i tysiačy vašych realnych stanoŭčych vodhukaŭ kamuści nie dajuć spakoju».
Kampanija dadała: «My hanarymsia jakaściu, staim za kožnym svaim praduktam i nie ŭdzielničajem u kankurentnych vojnach. My prosta robim toje, što ŭmiejem lepš za ŭsio — stvarajem pradukty, jakija sapraŭdy pracujuć».
Raniej kaśmietyku ad Luxvisage, jakaja aktyŭna pradajecca na rasijskim rynku, rekłamavała, naprykład, błohierka Ksienija Sabčak.
Ciapier čytajuć
Što Babaryka i Kaleśnikava adkazali na pytańni pra vajnu93
Kamientary